11 de diciembre de 2016
11.12.2016
Claudia Delso Concelleira de Participación e Innovación Democrática

"A xente agradece o 'Dillo Ti', nesta cidade non había costume de falar co Goberno"

"Queremos que espazos coma este continúen con gobernos diferentes" - "Non ten sentido que a oposición teña un espazo no 'Dillo Ti"

11.12.2016 | 11:06
Claudia Delso nunha sesión do ´Dillo Ti´.

O programa Dillo Ti cumpre un ano. A iniciativa, pioneira na cidade, senta unha vez ao mes aos membros do Goberno municipal fronte aos veciños, á espera das súas preguntas e queixas. A concelleira de Participación e Innovación Democrática, Claudia Delso, considera "moi satisfactoria" a experiencia e cre que os índices de afluencia son a proba de que na cidade había fame de interactuar de ti a ti coas persoas que teñen nas súas mans a rendas do Concello.

-Que lectura fai deste primeiro ano de Dillo Ti?

-A valoración é moi positiva, tanto do Dillo Ti como do resto de canles de participación que creamos. No Dillo Ti fixéronse oito encontros ao longo do ano, participaron en torno a 1.000 persoas, o que supón unha media de entre 100 e 120 persoas por reunión. A afluencia é moi satisfactoria, ao igual que a experiencia de que o Goberno fale directamente coa cidadanían, mantendo moita proximidade. É importante que o Goberno local faga ese esforzo de desprazarse e tamén que a xente se volque co seu barrio.

-Os últimos encontros sempre estiveron cheos. Por que cre que hai tanta afluencia?

-O formato penso que axuda, porque é moi simple e se trata dunha conversa mediada, cunha mediadora profesional, que só ten que tomar os tempos e dar as voces. Que se realice en fin de semana, os sábados, anima á xente a participar. Tamén axuda o traballo informativo que facemos para que a xente saiba que iso vai acontecer no seu barrio, así como os servizos de conciliación que temos para que poida ir todo aquel que teña nenos e nenas ou de intérprete de lingua de signos.

-Nestes encontros os veciños expoñen moitas queixas. Faise un seguemento delas para saber se se están a resolver?

-No momento en que se nos fai a pregunta, nós mesmos decidimos a que concelleiro lle toca responder. Do mesmo xeito, cada un tomamos nota e nos facemos cargo de facer un seguemento desas cuestións. Si que é certo que non é un seguemento tan sistemático como o que hai para as demandas que entran polo 010, pero haino. Moitas veces a xente propón asuntos sobre os que o propio concelleiro xa tiña constancia, pero iso axúdanos a reafirmar a importancia de temas que xa estaban na nosa axenda. Nese sentido, no de tomar o pulso á cidadanía, é unha ferramenta moi útil.

-Cal é a retroalimentación que reciben dos veciños ao acabar os actos do Dillo Ti?

-A xente agradece moito a cercanía porque dalgunha maneira non había costume nesta cidade de ver a todo un Goberno e poder conversar tranquilamente con eles, ou facer preguntas e demandas. Para nós o Dillo Ti é positivo porque nos axuda tamén a todos a poder dar un traslado de información con algo máis de tempo e tratando de explicar as cuestións máis en detalle. Hai trámites que teñen uns pasos administrativos que é normal que a xente non coñeza. Esta é unha oportunidade para explicar como funciona a administración. A xente agradece moito esa posibilidade de conversa, de plantexar temas concretos e moi pequenos até outros máis amplos sobre o modelo de cidade que queremos.

-Coa experencia destes oito encontros, que cambios introduciría no Dillo Ti?

-Todavía estou en proceso de balance e antes querería facer unha posta en común co resto de compañeiros. En xeral, creo que o formato é bastante exitoso e que non hai moito que modificar. É un acerto ir percorrendo toda a cidade. O último foi na Cidade Vella e o seguinte será en Os Rosales. Sempre tratamos de que haxa unha distancia entre un punto e outro e eu creo que manteremos sempre ese formato.

-Haberá posibilidade de reservar un espazo para oposición, como reclaman algúns partidos?

-Eu creo que é bastante sintomático e un pouco contradictorio por parte da oposición tratar de deslexitimar un programa do Goberno municipal. Por un lado preténdese deslexitimar a acción da Concellería pero por outro lado queren ter presenza. Non ten ningún sentido que participen porque é un programa do Goberno. Eles tiveron posibilidade de aplicar algo así cando gobernaron pero non fixeron nada. Non entra esa aportación que fai a oposición e lles pido que respecten a lexitimidade do Goberno para poñer en marcha os seus programas.

-Nalgunhas sesións fixeron promesas sobre obras ou investimentos que se desenvolverán no próximo 2017. Non é arriscado facer estes anuncios tendo en conta que o orzamento aínda está no aire?

-É un espazo que tamén posibilita dar un traslado de información e das iniciativas que está previsto que se fagan no barrio. Despois, obviamente, en cada obra específica que se fai en cada barrio mantemos a interlocución habitual coas asociacións da zona. Isto é unha toma de contacto, un espazo de traslado de información sobre cousas que se están facendo, que se fixeron ou que se poden facer no futuro pero cada iniciativa terá a súa tramitacion e haberá algunhas que se fagan exactamente e outras que non se fagan como tal.

-Cando comezará a segunda volta no Dillo Ti, repetindo centros cívicos?

-A intención é completar o conxunto de centros cívicos e, a partir de aí, xa tocará dar a volta. Xa veremos se damos a volta mantendo a orde ou non. A ver se este ano podemos facer planificacion con máis tempo.

-Pensa que, de saíren do Goberno, o apoio da xente ao Dillo Ti faría que se mantivese con outro partido en María Pita?

-Eu traballo sempre con esa perspectiva para todos os espazos de participación, pero non o sei. Esperamos que calquera que veña despois respecte ese dereito da veciñanza a participar no gobenro da cidade. Nós estamos tratando de colocar os vimbios.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es
Enlaces recomendados: Premios Cine