O persoal dos Museos Científicos da Coruña decidiu esta tarde desconvocar as xornadas de folga previstas para mañá e pasado na Casa das Ciencias, a Domus e a Casa dos Peixes, así como a mobilización que fora anunciada para o xoves ás 20.00 horas. Un total de 29 empregados, dos 31 que están en nómina, respaldaron á tardiña en asemblea esta decisión dando un voto de confianza ao concelleiro de Culturas, José Manuel Sande, que prometeu diversas melloras no prego de condicións do último contrato que saíu a concurso, como por exemplo o incremento da oferta económica.
