Dez vivendas e dous inmobles. Ese é en principio o obxectivo que se fixa o Goberno local coa posta en marcha do plan para a adquisición de pisos e edificios con destino ao parque municipal de vivendas, composto na actualidade por 403. A Xunta de Goberno Local aprobará o vindeiro venres as bases reguladoras do concurso mediante o que o Concello pretende adquirirá vivendas e inmobles aos propietarios que as oferten, para o que o orzamento municipal dispón dunha partida de 1,2 millóns de euros, que é máis reducida da prevista inicialmente, xa que foi recortada pola oposición durante o proceso de aprobación das contas.
O concelleiro de Rexeneración Urbana, Xiao Varela, cualificou esta iniciativa como un dos "proxectos estrela" das contas municipais deste ano e detallou que se dará por "satisfeito" se se conseguen mercar dez vivendas e dous edificios, aínda que o número ao que se chegue vai depender do prezo que oferten os donos. Varela sinalou que haberá un prazo de dous meses durante o que os interesados poderán ofertar as súas propiedades e que a compra se materializará na segunda metade deste ano.
As viviendas municipais concédense en réxime de aluguer a persoas con dificultades para acceder a unha delas, como as procedentes de desafiuzamentos ou poboados chabolistas, ademais daquelas que carecen de ingresos suficientes. Varela explicou que todas elas están ocupadas na actualidade, agás cinco que se destinan aos casos de emerxencia en cada momento.
O concurso municipal primará ás viviendas e inmobles situados no casco histórico, xa que segundo un estudo efectuado polo Concello, a meirande parte dos edificios abandonados están situados na Cidade Vella, a Peixería e As Atochas. Na iniciativa estableceranse dous lotes, un para pisos e casas unifamiliares rematadas e outro para edificios abandonados ou en ruínas. O prezo máximo que se abonará por metro cadrado será de 1.700 euros e será o factor máis importante para decidir a compra, aínda que tamén se valorarán aspectos como a accesibilidade, o número de estancias, a certificación enerxética ou o nivel de catalogación, e a existencia de anexos, ademais do estado de conservación.
Outro aspecto que terá en conta a Concellería de Rexeneración Urbana será a existencia de varios propietarios nun mesmo edificio, xa que este tipo de situacións producen con frecuencia desacordos que impiden a rehabilitación, de xeito que a adquisición polo Concello pode contribuír a resolver estes conflitos.
Unha vez que se presenten as ofertas, os técnicos municipais inspeccionarán as vivendas e inmobles para efectuar unha valoración, aínda que tamén se solicitará unha taxación a unha empresa externa. Unha vez que o Concello conte coas tres valoracións de cada propiedade, escollerase a máis baixa para presentar unha proposta aos propietarios. As propiedades que se adquiran e non estean en condicións de ser habitadas serán rehabilitadas mediante unha partida xa reservada polo Goberno local no orzamento deste ano para este obxectivo.
Varela tamén salientou que esta actuación do Concello pode permitir que o departamento municipal de Ruínas "dea saída" a edificios que na actualidade se atopan en malas condicións e cuxos propietarios non dispoñen de medios para rehabilitalos, ademais de a que os responsables municipais sexan "máis insistentes" cos propietarios deste tipo de inmobles para que cumpran cos seus deberes en canto ao seu mantemento. O concelleiro sinalou que a posta en marcha da compra de vivendas coincide coa nova orientación que se lle pretende dar á Unidade de Ruínas, na que se vai intentar que teña un carácter "máis activo que sancionador".
"A nosa intención é dar acceso á vivenda ás persoas con maiores dificultades", sinalou Xiao Varela sobre o obxectivo deste proxecto. O concelleiro cuantificou en 450 os inmobles deshabitados na cidade segundo o estudo realizado polo Concello, no que se sinala que estes edificios conteñen unha parte das 20.000 vivendas baleiras existentes en toda a cidade.
Os promotores inmobiliarios consideran esaxerada esta cifra de vivendas desocupadas, xa que aseguran que moitos deses pisos non son aptos para habitar por mor da súa deterioración, de xeito que o número real de vivendas baleiras sería moito máis baixo. Varela negou que esta iniciativa do Concello para a adquisición de vivendas supoña unha competencia á actividade dos promotores, xa que considerou que se até ao momento non interviron neste sector do mercado foi "porque non lles pareceu interesante".
