01 de septiembre de 2017
01.09.2017
María García Concelleira de Medio Ambiente da Coruña

"A Xunta non debería ter admitido o estudo da planta de Santa Icía polas súas carencias"

"Creo que todos vemos que un proxecto desas características non pode estar aí e agardo que Beatriz Mato tamén o vexa"

01.09.2017 | 13:27
María García, concelleira de Medio Ambiente.

- Hai unha especial preocupación do Concello polo proxecto da planta de residuos de Santa Icía?

-Estamos preocupados porque entendemos que non é a ubicación na que se ten que implantar esta instalación, que se dedica ao manexo de residuos e que vai ter un tránsito de camións. Debería estar nun polígono industrial, dos que hai moitos baleiros en Galicia, e non nun terreo rústico de protección forestal e moi próximo a núcleos de poboación. Non nos parece una ubicación axeitada para un proxecto destas características.

- A planta vai tratar residuos de construción, pero a actividade deste sector non medrou nos últimos anos.

-Pero si se está xerando unha economía arredor dos residuos, xa que é un servizo ao que as administracións non podemos renunciar en moitos casos. O que cuestionamos é se realmente fai falta agora mesmo construír una nova planta ou se se poderían aproveitar as existentes, que cremos que sempre é a mellor opción.

- Nas súas alegacións, o Concello di que a empresa non ofrece os datos necesarios para analizar o proxecto.

-O estudo de impacto ambiental ten unhas carencias gravísimas, polo que xa tería que ter sido inadmitido pola Consellería de Medio Ambiente. Non describe as infraestruturas e instalacións necesarias para o seu funcionamiento diario, como o abastecemento de auga, o saneamento, tendido eléctrico... Sabemos que existen porque aparecen nos planos, pero non se describen de ningunha maneira. Un aspecto moi importante, que é a analise das alternativas para decidirse por unha ubicación, é inexistente, xa que só se analizan o traballo manual e o mecanizado, cando isto é unha cuestión de escasa relevancia medioambiental e só interésalles a eles pola eficiencia dos procesos. Tampouco se analiza o impacto sobre a poboación nin o tráfico de camións para saber o uso que se fará das estradas e os fluxos de vehículos que haberá, cando sabemos que terá unha importancia altísima para a xente que vive nas proximidades. As carencias son tan serias que o proxecto debería someterse novamente a un estudo de impacto ambiental, pero non simplificado, senón ordinario.

- Cre que a Xunta non debería ter aberto o periodo de información pública do estudo de impacto ambiental?

-Entendo que o estudo que está sometido a información pública tería que ter sido inadmitido polas carencias enormes que presenta. A avaliación dos impactos ten que ser moitísimo máis pormenorizada, posiblemente para chegar á conclusión de que ese non é o sitio para poñer a planta.

- Os veciños da contorna semellan bastante preocupados porque están presentando alegacións e recollendo sinaturas contra a planta.

-Nós entrevistámonos cos veciños de Feáns e seguiremos visitando a zona para compartir impresións con eles. A verdade é que están preocupados porque entenden as repercusións que pode ter o proxecto polo tráfico de camións, ruído, dispersión de pó? Sabemos que a proximidade é moi escasa e que a preocupación é lóxica.

- Ten previsto o Goberno local alguna iniciativa se a Xunta da luz verde ao proxecto?

-Por suposto, estamos barallando as próximas accións en diferentes ámbitos e transmitirémolas no seu momento. Agardo que a Consellería de Medio Ambiente reflexione e vexa o que vemos todos de forma intuitiva, que unha planta desas características non se pode situar a 900 metros de Novo Mesoiro, ou Feáns ou a Urbanización Breogán. Creo que iso o vemos todos e agardo que Beatriz Mato tamén o vexa.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es