10 de diciembre de 2017
10.12.2017
Mónica Díaz Nova presidenta da asociación de veciños de Eirís

"Eu nunca vin un varredor na miña rúa, e coma min dous terzos do barrio"

"Non é o mesmo o que pasa na cidade que nunha zona rural como esta, aínda que en Eirís tamén temos unha zona urbana", asegura

10.12.2017 | 09:48
Mónica Díaz, presidenta da asociación de veciños de Eirís.

- Que supón para vostede chegar á presidencia da asociación de veciños de Eirís sucedendo a Suso Prado, que estivo trece anos nese cargo?

-Unha responsabilidade moi grande, pero non tería dado este paso se non tivese o compromiso do anterior presidente de continuar no equipo para seguir axudándonos en todo.

- A semana pasada participou vostede no Dillo ti realizado polo Concello no barrio e dixo que gran parte do barrio de Eirís aínda é unha zona rural. Nótase ese aspecto no día a día dos veciños?

-Nótase por exemplo en que a xente se queixa de pola súas rúas non pasa o varredor. Eu nunca vin un na miña rúa, e coma min dous terzos do barrio. Non temos beirarrúas e competimos cos coches cando imos por un camiño cara á parada do bus. A vida é moi diferente aquí.

- É difícil convencer ao Concello de que os veciños de Eirís tamén son coruñeses?

-Non é un problema deste Concello porque isto pasou sempre, senón do funcionamiento da propia institución, xa que presupón que todo o municipio é cidade. Cando eu era pequena e ía buscar o bonobús escolar, dicíanme que Eirís pertencía a Culleredo. Hai que ter en conta que non toda a xente vive en edificios de pisos, senón que algúns facémolo na aldea e temos horta, e queremos seguir téndoa e non vivir en edificios.

- No Dillo ti houbo moitas reivindicacións dos veciños?

-A veciñanza de Eirís sempre foi bastante reivindicativa. Suso, o anterior presidente, sempre intentou coordinar as reclamacións a través da asociación e levar as cousas de forma ordenada. Pero o problema que temos é que cando unha persoa protesta polo estado dun camiño, ás veces só da servizo a dous veciños, polo que se eles non reclaman e a asociación lles apoia, o movemento que se fai non é moito. Na rúa Lázaro Cárdenas, por exemplo, hai dúas fincas, unha municipal e outra privada, cuns eucaliptos que fan que a xente que vive alí non durma cando hai temporal por medo a que lle caigan enriba, xa que son moi grandes. Non é o mesmo o que pasa na cidade que nunha zona rural como pode ser esta, aínda que no barrio tamén temos unha zona urbana.

- Como lles afecta a proximidade do parque ofimático?

-O ofimático plantouse no medio de Eirís de Abaixo, onde derrubaron algunhas casas dos veciños e levamos anos convivindo con obras, camións e camiños cortados. Vivimos rodeados de matogueira, ruínas, ratas e serpes e cando reclamamos que se limpe, como o ofimático está sen acabar de delimitar e repartir, non hai quen se faga responsable de limpar unha finca. Unha parte do Camiño de Santiago pasaba ademais por onde está o ofimático e cambiaron o trazado porque quedaba no medio das obras.

- O alcalde anunciou a semana pasada a realización de obras de mellora da accesibilidade en Eirís de Abaixo. Cre que pode variar a situación que sofren?

-Polo menos poderemosvolver a entrar e saír de casa de forma normal e non dando voltas de quilómetros moitas veces para poder facelo. Temos esperanza de que a situación mellore porque o Goberno local polo de agora está falando con nós. infórmanos dos pasos que se van dando e consúltanos que opcións nos parecen máis viables para organizar o tráfico.

- Cal é a necesidade máis urxente en canto á mobilidade?

-En Eirís de Abaixo necesitamos unha vía de saída que libere a carga que supoñen para nós os colexios Eirís e Maristas, xa que o tráfico que xeneran provoca que a xente que vive alí non se poda mover nas franxas horarias de entrada e saída deses centros. Se abren unha vía desde os Maristas cara a Matogrande, liberaríanos e poderiamos saír de casa de 08.00 a 08.30 e de 16.00 a 16.30 horas.

- Hai algún equipamento que bote en falta no barrio?

-Para ir correr temos que ir a Casablanca e non hai ningún bus que nos comunique con esa zona e o centro de saúde está en Matogrande... Son moitas as cousas que necesitamos e non temos, xa que non temos garderías públicas coa cantidade de poboación que vai vir ao ofimático. Hai dotación de terreo para facelas, pero non sabemos cando.

- É suficiente o transporte público en Eirís?

-As frecuencias que temos son de case 25 minutos para un percorrido que dura 30, polo que son bastante insuficientes. Hai que ter en conta que os buses son dobres e a última hora da tarde van cheos, polo que si se utiliza o transporte público, e utilizaríase moito máis se houbera outras frecuencias horarias.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es
Enlaces recomendados: Premios Cine