08 de marzo de 2018
08.03.2018

Un kart de aluguer para concienciar sobre educación vial

08.03.2018 | 17:15
Un kart de aluguer para concienciar sobre educación vial
Alumnos do IES Universidade Laboral coa estructura do kart que crearán para o proxecto Edukart.

O IES Universidade Laboral de Culleredo é un dos cinco centros educativos seleccionados para participar na cuarta edición de Miniempresas Coruña, un programa coordinado pola Consellería de Cultura, Educación e Ordenación Universitaria, financiado pola Fundación Alcoa e no que colabora LA OPINIÓN. Ademais deste centro traballan nesta iniciativa que busca fomentar a creación de empresas o IES Isaac Díaz Pardo de Sada, o CIFP Ánxel Casal, o CIFP Paseo das Pontes e o CIFP Someso, este último con dúas miniempresas.

A educación vial, idea principal na que logo se asentou Edukart, o proxecto do IES Universidade Laboral para Miniempresas Coruña, xurdiu ao inicio de curso xa antes da convocatoria do programa. Este é un dos temas recurrente nas clases de titoría dos 26 alumnos dos grupos de Formación Profesional Básica de Fabricación e Montaxe de 1º e 2º. O coordinador da iniciativa, Jesús Villarino explica que a educación vial debería estar presente na vida dos rapaces dende idades temperás, xa que é "unha acción que moita xente realiza no día a día e que require unha concienciación". Para mellorar este aspecto, o alumnado que participa en Edukart pretende elaborar karts aplicando os coñecementos adquiridos en fabricación mecánica coa finalidade de alugalos a centros educativos e institucións que permitan aos cativos e a xente nova podan facer percorridos de práctica. Estes circuítos están pensados para montar en calquera pista deportiva ou explanada e contarán con sinais e elementos típicos das estradas permitindo, tras unha explicación teórica, poñer en práctica as normas básicas de circulación e de seguridade.

Villarino indica que tamén se pretende axudar á concienciación medioambiental porque os karts están construidos con materiais de refugallo (mesas, cadeiras, ferros e tubos?) inservibles que ían tirarse ao lixo. "O motor e os freos -engade- foron mercados de despedazamento e estanse restaurando". E se houbese tempo mesmo no descartan construir un kart eléctrico. Os alumnos traballan en equipos para a fabricación de tódalas pezas -o chasis, os elementos de soporte, o sistema de dirección, freos...- e deben coordinarse para que todo encaixe e en momentos puntuais "desviar persoal dun departamento a outro segundo as necesidades".

Pese a que neste proxecto "primou máis a utilidade social do proxecto que a posibilidade de beneficios" os participantes falaron con centros e entidades oficiais, públicas e privadas, que amosaron interese en instaurar programas deste tipo e dúas delas xa achegaron material de balde para colaborar na realización do proxecto.

Edukart promocionarase a través da páxina web que se cree, as redes sociais e falando directamente coas entidades que puideran estar interesadas. Os karts e demais material alugaranse directamente aos clientes, pero coa supervisión, explicacións, e charlas necesarias dos membros designados de Edukart para garantir as condicións de seguridade.

Villarino asegura que para os alumnos este proxecto está sendo "unha revelación" e "a motivación está polas nubes". "O feito de traballar en proxectos reais cunha aplicación práctica axúdalles a estar mellor preparados para afrontar os retos que supón a creación e xestión dunha empresa", conclúe.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es
Enlaces recomendados: Premios Cine