13 de mayo de 2018
13.05.2018

Marcela e Elisa, unha rúa no polígono de Náutica

O Concello rendeu onte homenaxe a "todas as 'Mariapitas' da cidade" con flores, música e unha lembranza a todas as veciñas que "defenderon o progreso e a autonomía dunha terra brava"

13.05.2018 | 17:24
Ferreiro e Dapena, onte, colocan unha coroa de loureiro aos pés da estatua de María Pita.

Unha nova rúa para dúas mulleres que abriron camiños, a cidade da Coruña contará proximamente, segundo explicou onte o alcalde, Xulio Ferreiro, cun vial no polígono de Náutica, que levará o nome de Marcela e Elisa, as mestras galegas que protagonizaron o primeiro casamento de persoas do mesmo sexo en España, en 1901.

É unha homenaxe da cidade ás súas veciñas, a dúas mulleres que -como tantas outras ao longo da historia- tiveron que loitar para reclamar un espazo que se lles tiña negado.

"Isto dá mostra de que A Coruña foi, e será, unha cidade pioneira no coidado e no respecto ás diversidades", lembrou onte Ferreiro, que puxo o foco en que a cidade da Coruña non se sumara "a unha onda de cambio" senón que estar mudando constantemente e "as arelas de liberdade" nunca deixaran "de estar presentes nas súas rúas e nos seus barrios".

A outra muller loitadora e persistente lembrou onte a cidade, a María Pita, coa ofrenda floral na súa casa, hoxe convertida en museo, e tamén ante a estatua que a recorda na praza do Concello. Ao acto acurdiron ademais do alcalde, Xulio Ferreiro, o concelleiro do PSOE José Manuel Dapena, que lle axudou a colocar a coroa de loureiro aos seus pés, e outros edís da Marea Atlántica. Non había na comitiva ningún representante do PP nin do BNG.

Estiveron tamén no acto os e as integrantes da orde de Cabaleiros de María Pita, e a Banda Municipal, que interpretou á chegada da corporación o Antergo Himno de Galicia e, ao final, acompañada da coral da Sagrada Familia, o Himno Galego.

No seu discurso, o alcalde lembrou que todas as "fazañas" que ten conseguido a cidade non poderían ter rematado igual sen a intervención das veciñas, para as que esixiu "a igualdade efectiva" e o derrubamento das barreiras. "Queremos recoñecer e agradecer o traballo e a memoria das outras Mariapitas desta cidade, o resto de mulleres que, desde o público ou o privado, desde o recoñecemento ou desde o anonimato, defenderon o progreso e a autonomía dunha terra brava, posuidora dun patrimonio inigualable e unha xenerosidade histórica", segundo explicou onte Ferreiro.

Soaron entón, os nomes Isabel Zendal, de Rosalía de Castro, de Emilia Pardo Bazán, de Concepción Arenal, e o nome das cigarreiras que clamaban polos seus dereitos laborais e tamén o das peixeiras. "María Pita tamén está hoxe en día aquí, entre nós, con todas as veciñas que, como ela fixo, empuñan espadas. Espadas que non posúen o fío da violencia senón que están cargadas de dignidade e que serven para facer fronte a todas as mandas de covardes, dos que se senten ameazados polas liberdades e responden co terror contra as mulleres", explicou Ferreiro no seu discurso.

O alcalde tamén fixo referencia na súa intervención á recuperación do patrimonio histórico da cidade, como o castro de Elviña, a restauración da Porta de San Miguel ou as actuacións que se están a realizar tanto no acueduto do paseo das Pontes, parte da Viaxe de Visma, ou no xacemento do convento de San Francisco. Falou ademais o rexedor da loita veciñal por non perder a oportunidade de decidir sobre a fachada litoral cando sexa liberada.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es