As 'Viñetas Inclusivas' de Viñetas desde o Atlántico chegan esta semana á Coruña

O Viñetas desde o Atlántico, o Salón Internacional do Cómic da Coruña, regresa esta semana á Coruña tras os actos centrais do mes de agosto. En concreto será con novas iniciativas xunto a colectivos desfavorecidos no marco de 'Viñetas Inclusivas'.

A programación comezará este martes 24 e estenderase ata o venres 27. Durante estes catro días realizaranse visitas guiadas a cargo de Tonecho Otero co Comité Cidadán Antisida da Coruña (CASCO), tanto a través das exposicións monográficas de Marc Torices e Susanna Martín, como da Expofanzine e a mostra bibliográfica dos Premios Castelao que se sitúan na Sala de Exposicións de Palexco.

O mércores 25, ás 18.30h, terá lugar na Biblioteca Municipal Infantil e Xuvenil de Durán Loriga o obradoiro interxeracional 'Viñetas para todo o mundo', en colaboración con Aspronaga e Dismacor, da man da xornalista especializada en educación e inclusión Sonia Hermida.

Por último, o venres 27, á mesma hora e no mesmo lugar, realizarase a presentación do fanzine Nai dos desterrados, editado por Amnistía Internacional. Trátase dunha publicación orientada a sensibilizar sobre o papel das mulleres nos conflitos bélicos, con viñetas de Lucía Corral, Chano Ripio, Clara Artiaga, Ada Domeque (Empanada), José Nogueira, Xoana Pousa (Cuchiflainas), Ana Pumares e Marta Argüelles, mentres que a portada está firmada por Bea Gregores.

Ademais, en paralelo, e ata o vindeiro luns 30 de setembro, as exposicións desta 27ª edición de Viñetas desde o Atlántico seguen abertas ao público nas diferentes salas municipais da Coruña, máis alá de que no Kiosco Alfonso desenvolveranse novos actos de Viñetas desde a Escola ata xaneiro de 2025.