A pegada de 175 anos de arquitectura, á vista no Museo de Belas Artes da Coruña

O Palacio Municipal de María Pita (Pedro Mariño). A fonte de Pajaritas (Ramón Tenreiro). O chalet de Villa Felisa, na Ciudad Jardín (Eduardo Rodríguez-Losada). O Hotel Finisterre, e a Solana (Santiago Rey Pedreira). A Casa de las Ciencias (Felipe Peña). Estes son algúns exemplos coruñeses dos centos de inmobles do último século e medio creados ou reformados por 23 arquitectos membros da Real Academia Galega de Belas Artes, e que se recollen na exposición Arquitecturas que falan do seu tempo. Abriu este mércores nun inmoble que forma parte da propia exposición: o Museo de Belas Artes da rúa Zalaeta, deseñado por Manuel Gallego Jorreto. Poderá visitarse ata o 23 de febreiro.

A mostra conmemora os 175 anos de existencia da academia, fundada en 1849 na Coruña, nun primeiro momento con alcance provincial, por decreto de Isabel II, e entre os 23 arquitectos homenaxeados, todos eles académicos de honra ou número, están dous fundadores, Faustino Domínguez Domínguez (responsable do edificio da Deputación en Riego de Agua e da desaparecida Casa Caruncho) e José María Noya. Está comisariada por Alfredo Sellier e Xosé Manuel Casabella (tamén académico, e o autor do centro de especialidades médicas do Ventorrillo). Segundo explicou onte o segundo na inauguración, a exposición busca explicar a «evolución» da arquitectura no último século e medio, no que apareceron innovacións como as galerías da Coruña. Tamén falar dos «valores» da profesión e ser unha «homenaxe» aos académicos.

La Semana de la Arquitectura se centra en construcción en altura

Ademais dun panel con información para cada un dos arquitectos recollidos, que inclúe unha pantalla na que se pasan imaxes dos seus deseños, a mostra inclúe 15 obras artísticas orixinais, como un cadro adicado ó Muro, a parte do porto da Coruña na que está a Lonxa, da autoría de Rafael Correa. Tamén hai varios paneis temáticos que explican a creación da academia e da súa sede, o edificio do Consulado, así como a historia do Museo de Belas Artes, ligado á institución.

«Fundamental» na cultura

A exposición conta coa colaboración da Xunta, e o conselleiro de Cultura, Xosé López Campos, destacou na presentación de onte os «moitos meses» de traballo necesarios para reunir as imaxes que forman parte dela. A arquitectura, destacou, é «parte fundamental» do patrimonio cultural galego. O presidente da Real Academia Galega de Belas Artes, Manuel Quintana, sinalou que a esta mostra de aniversario se unirán outras exposicións, conferencias e concertos, que empezaron onte no teatro Colón e seguirán onte e mañá ás 20.00 horas na mesma localización. A directora do Museo de Belas Artes, Ángeles Penas, explicou como a creación deste provén das actividades da academia.

Cien años de Belas Artes: El museo de A Coruña al que revivió un robo

A mostra recolle inmobles de diversas partes de Galicia e incluso o estranxeiro, pero hai unha importante presenza da Coruña, con inmobles de nova construción como o colexio Calasanz, deseñado por Andrés Fernández-Albalat. Tamén hai obras desaparecidas, como o desmontado depósito da Medusa, deseñado por César Portela, ou a antiga praza de touros da cidade, de Juan de Ciórraga. E remodelacións, como a do castelo de San Antón, a cargo de José Ramón Soraluce, ou a rehabilitación da antiga vivenda de Casares Quiroga, agora convertida en casa-museo; a reforma foi da autoría de Felipe Peña.

Suscríbete para seguir leyendo