Fin de semana de magostos nos barrios coruñeses

O vindeiro fin de semana diferentes barrios da Coruña celebrarán os tradicionais magostos do outono.

O primeiro será este venres día 8 na festa organizada pola asociación veciñal de Labañou, San Roque, Zona Escolar e Os Rosales. Este será na praza da Tolerancia cun obradoiro de cabazas a partir das 17:00 horas e unha procesión de Samaín desde a praza do conservatorio a partir das 18:45 horas.

Ademais, haberá tres actuacións: a primeira será o espectáculo familiar dos Monifates (19:15 horas), deseguido a actuación do grupo de música tradicional Son d'Aquí (20:00 horas) e rematará coa Mekanika Rolling Band (21:00 horas). Como non podía ser doutra maneira, haberá castañas de balde e chocolate para a rapazada.

Ao día seguinte, o sábado 9, a Cidade Vella tamén celebrará o seu magosto, promovido pola Asociación de Veciños da Cidade Vella. Será na praza de Azcárraga desde as 17:00 horas cun obradoiro de cabazas e xogos infantís tradicionais. Ás 19:00 horas comezará a procesión de cabazas para, media hora despois, celebrar o magosto popular con bebida e castañas asadas. Son D'Aquí tamén actuará a partir das 20:15 horas e, a partir das 23:00 horas haberá queimada popular.

Por último, o domingo 10, de 11:00 a 20:00 horas, Os Mallos celebrará o Mallosto, que está promovido pola FUCC e Distrito Mallos. A celebración será na praza da Agra dos Mallos e haberá un mercado de outono, con postos dos comercios do barrio e de artesanía de 11:00 a 19:00 horas. Tamén haberá postos de comida ata as 20:00 horas. Durante a xornada haberá actividades infantís, así como obradoiros e actividades. A sesión vermú será a cargo da Duendeneta de 13:00 a 15:00 horas e, de 18:30 a 20:00 horas, actuación musical de Bailaches Carolina Dilleis.