En directo: así foi a gala dos XXIV Premios Opinión da Música de Raíz

Foto de familia dos galardonados e participantes ao remate da gala celebrada este mércores no teatro Rosalía.

Curiel bromeu co feito de ter sido nomeado ata cinco veces aos Premios Opinión sen ter gañado nunca. "Eu son xa da casa. Penso que debían dar un premio a quen estivo nomeado máis veces", dixo, antes de convidar á tamén cantante Iris Gey a acompañalo no escenario, no que interpretou unha escolma de músicas do mundo con presenza da cantiga de amigo que ven "da raíz máis fonda" da tradición galegoportuguesa.

A actuación de Xoán Curiel en formato cuarteto con arpa, percusión e frauta pecha a gala no teatro Rosalía

Actuación de Xoán Curiel nos XXIV Premios Opinión da Música de Raíz.

Jacobo Sutil, presidente da Axencia Galega das Industrias Culturais (AGADIC), entrega o premio Andaina Senlleira a Pepe Ferreirós, de Milladoiro.

Pepe Ferreirós, de Milladoiro, ao recoller o premio Andaina Senlleira: Nunca estamos pensando nos premios, o traballo é o cotián, pero, cando polo que sexa na sociedade nos recoñecen o traballo, é sempre unha grande ilusión. Nós sentímonos moi premiados pola sociedade galega en xeral. Non sei se merecemos o de senlleira, sería pretencioso pola miña parte dicilo, pero é unha andaina longa, que empezou, precisamente, nesta cidade da Coruña hai 46 anos ininterrompidos, cunha longa andaina teimuda na defensa e na difusión da nosa música popular. Estou especialmente emocionado por recibir este premio hoxe aqui, despois de ter escoitado a Cántigas da Terra, que para Milladoiro foi sempre un referente. Sen estes grupos, non tería sentido o folk"

Grupo de baile e gaitas da formación tradicional Cántigas da Terra na actuación da gala dos XXIV Premios Opinión da Música de Raíz.

Actuación de Cántigas da Terra na gala dos XXIV Premios Opinión da Música de Raíz

Luis Bolón, de Cántigas da Terra: "Para nós é un privilexio poder estar nesta celebración dos Premios de Raíz, uns premios e un escenario polos que xa pasaron o mellor do folk galego. Subliño o de galego, porque a preocuapción pola nosa lingua ha de ser máxima. Agardo que teñamos moitas máis galas dos Premios Opinión. Grazas a La Opinión e a Óscar Losada por convidarnos".

A formación tradicional interpretou pezas como a Pandeirada de Montouto ou o Canto de Xil de Cambados. Concluiu a súa actuación coa Foliada de Cerdedo.

Actuación de Cántigas da Terra nos XXIV Premios Opinión da Música de Raíz.

Turno para Cántigas da Terra. A formación sobe ao escenario do Rosalía para interpretar un adianto do que será o seu vindeiro espectáculo, con cancións que non foran gravadas antes polo coro.