Envían á alcaldesa Inés Rey e ao conselleiro López Campos as bufandas tecidas agardando que salvasen os murais de Lugrís

Os colectivos cidadáns In Nave Civitas e a asociación O Mural organizaron na tarde deste sábado unha protesta ante o edificio do antigo restaurante Fornos da rúa Olmos, onde están os murais de Urbano Lugrís que foron declaradas Ben de Interese Cultural en outubro do pasado ano.

Na intervención ante o establecemento, os asistentes teceron bufandas. Ao acto chamáronlle Penélope Fingal agardando polo Concello, posto que remite á espera da esposa de Odiseo, pois Lugrís firmou en ocasións como Ulises Fingal.

Agora, tras esta acción reivindicativa, In Nave Civitas vén de enviar á alcaldesa da Coruña, Inés Rey, e ao conselleiro de Cultura da Xunta, José López Campos, dúas bufandas tecidas durante a concentración. No remite das cartas indicábase o enderezo onde están situadas as pinturas.

Estes tapabocas ían acompañados dos primeiros versos da Penelopea, o poema épico que, segundo denuncian estes colectivos, "pode rematar en tráxico se Xunta e Concello seguen, por sexto ano, eludindo as súas responsabilidades para salvar esta obra senlleira da pintura mural ibérica".

Precisamente o día antes desta concentración viviuse un novo cruce de acusacións entre as diferentes administracións. A Dirección Xeral de Patrimonio Cultural da Xunta de Galicia remitiu unha advertencia formal tanto ao Concello da Coruña como aos propietarios do inmoble alertando sobre o "deficiente estado de conservación" do edificio no que se sitúa este histórico patrimonio artístico da cidade.

Así es el estado en el que se encuentran los murales de Lugrís en la calle Olmos