O Festival Noroeste Estrella Galicia mellora as súas medidas de accesibilidade

O Festival Noroeste Estrella Galicia aumenta as medidas de inclusión respecto a edición do pasado. O Concello da Coruña quere que este festival sexa aberto, inclusivo e accesible para todo o mundo, con estas accións pretenden eliminar as barreiras físicas, sensoriais e comunicativas para que todas as persoas poidan gozar da música e da cultura. As medidas, que presentou esta mañá de xoves a alcaldesa, Inés Rey, inclúen a interpretación en lingua de signos, mochilas vibratorias, bucles magnéticos, cascos illantes, mapas accesibles e zonas reservadas para persoas con mobilidade reducida. "Con estas medidas pretendemos facer real o dereito de acceder a cultura en igualdade de condicións", explicou a rexedora.

As actuacións mais destacadas do festival como as de Yerai Cortés, Dorian, Baila, Spirits, Rusowsky, Sés, Bomba Estéreo e Echo & The Bunnymen, disporán de todo o abano das medidas de inclusión. "É unha experiencia piloto coa que comezamos este ano, contamos con dous escenarios principais que son o de Riazor e o de María Pita, onde haberá un servizo de préstamo destes equipos", indicou Rey. O sistema de préstamo estará accesible 90 minutos antes do comezo dos concertos, as persoas que o precisen terán que solicitar os equipos nos puntos de información, en María Pita o posto estrá diante da igrexa de San Jorge, e nos concertos da praia estarán ao lado da caseta de socorrismo de Riazor.

Na programación

Este ano tamén hai inclusión na programación artística. "Por primeira vez o festival contará con proxectos como a Banda Diversidarte, Freestyle People & Gallos del Norte e a Orquesta Invisible, que son iniciativas culturais formadas por persoas con diversidade funcional que fan da música unha ferramenta de expresión, participación e transformación social e humana", expresou Inés Rey.

Estas medidas pretenden facer de A Coruña unha cidade mais inclusiva en todos os ámbitos, no urbano, nos servizos públicos, equipamentos municipais e na programación cultural. "Con este festival queremos converternos nunha referencia de inclusión e accesibilidade, porque aspiramos a formar parte da rede de festivais inclusivos da fundación Music for All", recalcou a alcaldesa.

Queixas

Segundo informou La Opinión, varios usuarios con problemas de mobilidade queixáranse das ubicacións que lles asignaron na edición do ano pasado: situáranos lonxe do escenario ou —mesmo no caso da praza de España— detrás de obstáculos que lles impedían a visibilidade. Os usuarios de cadeira de rodas levaron unha desagradable sorpresa ao chegar ao escenario que o festival instala cada ano en Riazor e descubrir que, a diferenza de anos anteriores, a zona reservada para persoas con mobilidade reducida estaba situada a unha distancia considerable do escenario.