04 de febrero de 2011
04.02.2011

Lembranza dun pioneiro do cine galego

O CGAI homenaxea a carreira do director coruñés Miguel Gato, falecido o pasado mes de novembro e un dos principais artífices do movemento audiovisual galego dos anos 70

04.02.2011 | 02:34
Miguel Gato (primer plano) junto a Miguel Castelo. / cgai

Persoeiros do mundo do audiovisual galego acudirán mañá ao Centro Galego de Artes da Imaxe (CGAI) para honrar a memoria do director coruñés José Miguel Gato Luaces (Moeche, 1948 - Madrid, 2010), un dos pioneiros do movemento do cine galego nos anos 70. Autor de cintas como 'A tola' e 'O herdeiro', Gato desenvolveu tamén un importante labor como xornalista cinematográfico en diversas publicacións do país. O CGAI proxectará catro películas do director herculino e tras iso presentarase unha mesa redonda para parolar sobre a súa carreira, na que intervirán compañeiros de Gato como Miguel Castelo, Víctor Ruppén ou Pepe Coira

O Centro Galego de Artes da Imaxe (CGAI) renderá mañá homenaxe a un dos pioneiros do cine galego dos anos 70, Miguel Gato. O director coruñés, falecido o pasado 19 de novembro en Madrid, será lembrado por algúns dos seus colegas nunha mesa redonda, logo de visionar algúns dos seus traballos máis importantes. O acto comezará ás 18.00 horas.

Nesa conferencia participarán o director Miguel Castelo, o profesor de Historia do Cine Juan Hernández Les, o produtor Víctor Ruppén, o profesor Luis Álvarez Pousa, o produtor e crítico Pepe Coira e o director Antonio Simón, todos ligados á figura de Miguel Gato despois de traballar con el en diversas producións ou por ser grandes admiradores do seu cine. Non poderá estar Henrique Baixeras, tamén compañeiro e amigo de Gato que comezou xunto a el, Castelo e Simón no Club Amateur da Coruña, onde acudían asiduamente para parolar sobre cine co realizador Ernesto Díaz Noriega.

En 1974 Miguel Gato realiza a curtametraxe A tola. Para o seu compañeiro e amigo Miguel Castelo, esta cinta é unha das súas favoritas. "Está convertida nunha especie de mito, era unha película realmente dura, representaba unha metáfora sobre a opresión política na época da ditadura", explica Castelo, que lembra o momento en que a curta foi exposta nas Xornadas de Cine de Ourense -organizadas por Luis Álvarez Pousa- e o Gobernador Civil abandonou a sala "airado" dicindo "ahora ya sé lo que es el cine gallego".

No filme A tola, a actriz Suri Sánchez encarnaba a Galicia, unha Galicia, di Castelo, "asoballada por unha chea de circunstancias que a rodeaban". Tralas Xornadas de Cine, a película, rodada en 16 mm reversible -de maneira, explica Castelo, que "a propia copia que existía era o negativo"- foi secuestrada polo Tribunal de Orden Público e posteriormente perdida nos arquivos da Dirección General de Seguridad en Madrid. "Os que non a viron no seu momento xa non poderán vela", comenta Castelo.

Os seguintes traballos de Gato foron O herdeiro (1976), premio á mellor curtametraxe en lingua hispana no Festival de Huesca, e os documentais A rapa das Bestas e Os cigarróns, ambos de 1977. Máis tarde, no ano 1991, dirixe a súa última curta: Pesquisas. O caso das galiñas aforcadas.

Respecto á cinta O herdeiro -que foi producida por Víctor Ruppén-, o director Miguel Castelo destaca ese carácter "austero e lacónico co que amosou o abandono do rural por parte das novas xeracións da burguesía. Gato quixo transmitir esa especie de traición por parte das novas clases acomodadas que abandonaban o patrimonio rural e con el, parte da cultura de Galicia".

Ruppén, que falará na mesa redonda sobre a súa participación en O herdeiro, destaca de Miguel Gato o seu "entusiasmo e dedicación entre todo o amateur das primeiras películas en 8 e 16 mm, o detalle de non saber por onde ir e dar paos de cego para empezar, pero con total entusiasmo". "Na época, eles (Gato, Castelo, Baixeras, Simón) eran un grupo de amigos moi do cine e eu era un pouco o estrano, xa que era o produtor", di Ruppén.

Gato desenvolveu tamén un importante labor como xornalista cinematográfico con colaboracións en páxinas culturales de El Socialista, Villa de Madrid ou o suplemento literario de El País, así como de guionista para Telemadrid e ETB.

No ano 1978 publicou El cine de autor en España en colaboración co profesor Juan Hernández Les.

Compartir en Twitter
Compartir en Facebook

Globos de Oro 2019

Globos de Oro 2019

Conoce los nominados a los globos de Oro, las imágenes de la alfombra roja en directo y novedades de la gala

 
SORTEO ENTRADAS: 'OVO' del Circo del Sol
El Circo del Sol visita A Coruña, del 21 al 30 de diciembre, con su espectáculo OVO que ofrecerá en el Coliseum de A Coruña. En LA OPINIÓN sorteamos 10 entradas para que no te lo pierdas.