Cantareira, Palabra do Ano 2024 da Real Academia Galega

A palabra 'cantareira' foi a elixida na votación popular impulsada pola Real Academia Galega (RAG) e a Fundación Barrié para escoller a palabra do ano 2024.

"A palabra do ano 2024 soa a poesía e música, a ganas de compartir bos momentos, a voz feminina e colectiva, a lingua propia (...). Unha chamada colectiva a mirar con ilusión cara ao futuro que está a piques de comezar, un novo período de 12 meses no que Galicia enteira lle renderá homenaxe ás mulleres que durante séculos mantiveron vivo, transmitiron e enriqueceron o cancionero popular e o idioma do país", destacan nun comunicado.

E é que a palabra 'cantareira(s)' designa ás protagonistas do Día das Letras Galegas 2025, festa que a RAG dedicará á poesía popular oral e ás mulleres que cantan e crean cantigas.

"O anuncio o pasado mes de xullo desta decisión alcanzou unha enorme repercusión social, seguramente sen precedentes, que mostra o recoñecemento da súa contribución á creación e á conservación dun tesouro patrimonial colectivo, no que poesía e música son dous partes indisolubles", remarcan.

Con todo, a RAG apunta que esta elección apela tamén ás novas xeracións de intérpretes e creadoras que "beben desta herdanza dun pobo que segue cantando en galego e que atopa nesta forma de expresión unha maneira contemporánea e vivificadora de proxectar no mundo toda a súa creatividade e potencia cultural".

Un 25% dos votos

'Cantareira', co 25% dos votos, foi a palabra con máis apoios dos participantes. A segunda opción, cun 23%, foi 'meu, miña', "outra proposta que remite á oralidad e que apareceu entre as finalistas como alternativa do anglicismo 'bro', apócope de brother (irmán)".

A terceira palabra máis votada foi 'fala', coa segunda acepción que recolle o dicionario, "lingua natural propia dunha comunidade humana". Cun resultado moi próximo, obtivo a cuarta posición 'aparvar(se)', referido á preocupación polos efectos do consumo excesivo de contidos en redes sociais.

En quinto e sexto lugar quedaron 'dina', substantivo formado a partir do acrónimo da locución 'depresión illada en niveis altos', referido á traxedia de Valencia, e o sintagma nominal 'emerxencia climática'.