O Concello troca o nome da placa da rolda do Dépor, que xa é "da Coruña"

Dentro da campaña da iniciativa Aquí tamén se fala que pretende a adecuación do nome oficial do Dépor ao topónimo, o Concello da Coruña accedeu a petición vía rexistro do colectivo para que o nome da Rolda Real Club Deportivo de La Coruña perdese a L e seguise a liña da Lei de normalización lingüística, en vigor desde 1983.

Desta maneira, desde a mañá deste venres, a súa denominación é Rolda Real Club Deportivo da Coruña. A modificación foi escenificada nun acto no que estiveron os rapaces do IES Rafael Dieste, impulsores desta iniciativa, e o concelleiro de Cultura, Gonzalo Castro. As placas onde se fixo o acto atópanse na rotonda do Pavo Real, a uns metros do centro educativo.