Atopan unha persoa falecida dentro dun transformador en Carballo

Traballadores dunha compañía eléctrica encontraron este xoves unha persoa falecida no interior do transformador dunha subestación situada na rúa de Compostela, en Carballo.

Foron os operarios quenes avisaron o 112 Galicia poucos minutos antes das 12.30 horas. Segundo a Garda Civil, o corpo estaba posiblemente electrocutado.

Ata o lugar desprazáronse unha dotación de Urxencias Sanitarias de Galicia-061 e axentes da Garda Civil e da Policía Local.

Os servizos de emerxencia desconectaron a corrente para poder recuperar o corpo en condicións de seguridade. As forzas da orde investigan os feitos para esclarecer o sucedido. O corpo foi trasladado ao Chuac para facerlle a autopsia.