11 de junio de 2011
11.06.2011
Sada / BetanzosConcelleiro do PP de Curtis e deputado no Parlamento galego a partir do 14 de xuño

Antonio Fraga: "Débome aos veciños e ao Concello, o de entrar no Parlamento é circunstancial"

"Teño varias iniciativas na cabeza pero gustaríame falalas cos grupos municipais e cos alcaldes da zona. A vida municipal dache para pensar moitas veces en cousas que lle pedirías á Xunta"

11.06.2011 | 02:00

Protagonizou, sendo candidato do PSOE, un dos pactos máis peculiares dos últimos anos en Galicia. Gobernou dous anos e os outros dous fíxoo o candidato do PP. "Non coñezo outro pacto no que se respetasen os compromisos adquiridos", subliña Antonio Fraga, tenente de alcalde de Curtis. Iso foi na lexislatura 1999-2003. Pouco despois pensou en abandonar a política, mais finalmente afíliase ao Partido Popular. O vindeiro 14 de xuño tomará posesión da súa acta de deputado no Parlamento galego

Antonio Fraga (Teixeiro, 1967) tomará posesión o vindeiro martes da súa acta de deputado no Parlamento galego. Subliña que iso será posible grazas "a un traballo de moitos anos" no que o axudou "moitísima xente" e tamén "ás circunstancias". "As veces téñense que producir varias para que alguén coma eu, un simple concelleiro nunha localidade pequena, chegue a parlamentario". No seu caso, á renuncia de varios deputados autonómicos para dispor do bastón de mando, xa que o cargo é incompatible co de alcalde. A piques de entrar na Cámara autonómica, ten claro que "a municipal é a base da política, igual que a familia o é da sociedade".

-Cando e por que decide entrar na política?

-Despois da vida académica e de facer o servizo militar puxen un par de negocios en Teixeiro. Considero, nese momento, que o Concello, os servizos municipais, deberían funcionar mellor do que funcionaban. Tiven problemas incluso coas licencias municipais, cando non debera haber ningún. Dende a miña actividade profesional vía que as cousas podían cambiar para mellor e foi por iso polo que me decidín a presentarme en 1999 ás eleccións.

-Que estudiou?

-Estudiei Dereito e deixeino en terceiro curso. Logo fixen un máster en xestión medioambiental e desenvolvemento sostible e algúns cursos máis referentes ao medioambiente e ao urbanismo, sobre todo.

-E os negocios, aínda os leva?

-Montei un negocio de hostelería e logo un supermercado, pero xa están alquilados.

-Que sucedeu en 1999 no Concello de Curtis?

-Fixemos un pacto de goberno entre a candidatura do outro alcalde, Javier Caínzos (PP) mais a miña. Fixemos un pacto polo que eu sería alcalde ata o 2001 e do 2001 ao 2003 seríao Javier.

-Algo pouco habitual...

-Non coñezo outro pacto no que se respetasen as palabras dadas e os compromisos adquiridos. Debeu de ser o único sitio en Galicia.

-Cando decide abandonar o PSOE e entrar no PP?

-Aos dous ou tres meses de acabar a lexislatura 1999-2003 decido non volver presentarme (a alcalde), porque o meu era seguir cos negocios que tiña e vin que as cousas que xa cambiaran. Parecíame que Javier o ía facer ben como alcalde, como así foi e decidín deixalo. Entre dous e catro meses antes das eleccións avisei á organización comarcal do PSOE para que buscase outro candidato. Despois na política municipal fas amigos, amistades... No meu pasado tiven amigos moi relacionados co Partido Popular e ao final pois a oferta que nos fai o PP para ir baixo as súas siglas e os compromisos co Concello eran demasiado bonitos como para dicir que non. Pideumo varia xente, tamén Javier Caínzos e decidín ir no PP, dando as explicacións necesarias ao PSOE, incluso ofrecéndome a explicalo na Casa do Pobo de Betanzos, cousa que non se produciu, pero non porque non quixera.

-Pero en 1999 non foi a súa estrea en política.

-Aló polo 1993 pedíromme que organizara o PSOE en Curtis e fora tamén polo PSOE nunha candidatura en 1995, pero nun posto moi retrasado.

-Contaba con saír deputado?

-Non, en principio non. Cando se gana por maioría absoluta en 2009 si era coñecedor de que o presidente Feijóo quería que os deputados traballasen a tempo completo, dividir o tema goberno e consellerías do que eran os deputados, co cal os altos cargos, conselleiros, directores xerais... abandonarían o Parlamento. Aí comeza unha etapa na que si pensas que podes entrar, pero sen maior historia. O meu traballo está adicado plenamente ao Concello. Pensas si xorde xordee se non, non pasa nada tampouco. O que teño claro e que me debo aos veciños e ao Concello, que é polo que entrei en política e polo que vou seguir en política. Esto de estar no Parlamento considero que é circunstancial, en calquera caso.

-Compatibilizará o seu labor coma deputado co de concelleiro?

-Si, vou intentalo.

-Xestionará de novo medioambiente?

-Iso é competencia do alcalde. Coido que si, pero teremos que falalo.

-É cedo mais ten xa algunha iniciativa urxente para Curtis?

-Teño varias na cabeza, pero gustaríame falalas cos grupos municipais e cos alcaldes da zona. A vida municipal dache para pensar moitas veces en cousas que lle pedirías ao Parlamento ou ao Goberno da Xunta.

-Xa o pararían para facerlle peticións.

-Hai de todo, sobre todo pequenos e medianos empresarios e profesionais liberais que xa teñen falado comigo e me teñen plantexado problemas cos que se atopan na súa vida profesional, pedíndome que leve a cabo algunha iniciativa, sobre todo nestes tempos (de crise).

Compartir en Twitter
Compartir en Facebook
 

LA OPINIÓN A CORUÑA te invita a disfrutar de la carrera más divertida del año. Responde a las preguntas y participa en el sorteo de 10 dorsales para la SAN SILVESTRE CORUÑA 2018, que se celebrará en A Coruña el 31 de diciembre.

En estas fiestas, sobran los motivos para beber elaboraciones de vino gallego. En 2018, Galicia firmó la segunda mejor cosecha de su historiay nuestras bodegas despiden el año con un buen balance en todos los sectores 

esquelasfunerarias.es