10 de junio de 2018
10.06.2018
SADA | Isabel Reimúndez, candidata do BNG á Alcaldía nas próximas eleccións

"A política municipal precisa agora un liderado forte e moitísimo diálogo"

"Temos moitísimas restricións para a contratación de persoal. Eu agardo que o novo Goberno levante o veto e que podamos dotar aos servizos sociais de máis traballadores"

10.06.2018 | 13:53
A concelleira de Benestar e candidata á Alcaldía polo BNG de Sada.

- Estrenouse no goberno sen experiencia política e nunha área que precisa de moito contacto veciñal, Benestar Social. Como foron estes anos de mandato?

-A verdade é que entrei cun pouco de inseguridade pola xuventude, tiña 27 anos recén cumpridos, pero fixemos moitos esforzos e acadamos uns orzamentos moi sociais. Aínda que todo é mellorable, estou contenta; nótome moitísimo máis segura e xa non vexo tanta diferenza de nivel con outras persoas da corporación.

- Como concelleira de Benestar Social, que asunto lle provocou máis desvelos?

-A falta de medios dos servizos públicos, sobre todo nos servizos sociais. Temos moitísimas restricións para a contratación de persoal e o que temos non é capaz de asumir toda a demanda. Agardo que o novo Goberno levante o veto á contratación na administración pública e podamos dotar aos servizos sociais de máis persoal.

- Mostrouse especialmente crítica nestes anos cos retrasos na lei de dependencia...

-É que moitos dos veciños e veciñas veñen falar comigo polo retraso das axudas á dependencia da Xunta, que ten un prazo medio de resolución dun ano e medio. Desde o Concello aumentamos moitísimo os fondos, triplicamos a partida de axuda a domicilio para asumir o servizo de todas esas persoas en lista de agarda. Eu creo que eso foi algo moi positivo para Sada.

- E que foi o que máis satisfaccións lle reportou?

-Pois estou moi satisfeita da resposta ás campañas en contra da violencia de xénero e pola igualdade. Todo o mundo respondeu moi ben. Estou moi satisfeita porque ademais temos unha xente nova concienciada e o comercio e a hostelería responden moi ben ás campañas que propoñemos.

- Será a primeira muller candidata polo BNG de Sada. Como será o seu equipo? Avanzaba esta semana que a lista terá unha importante presenza feminina...

-Somos un equipo moi novo, con moitas mulleres da miña idade, bueno, non sei se podo considerarme nova con trinta anos, algúns xa me din que non o son tanto [ri]. Somos un equipo cunha importante presenza de mulleres e queremos combinar a ilusión e a enerxía da xuventude coa nosa experiencia como forza que logrou ter a Alcaldía.

- Encabeza a candidatura do BNG nun momento delicado para a formación. A escisión da formación, a saída de Abel López Soto e a irrupción de Sadamaioría pasoron factura ao BNG. Que cre que precisa para recuperar ao electorado?

-Eu creo que a política municipal neste momento o que precisa é un liderado forte, moitísimo diálogo e capacidade de comunicación e de consenso nun contexto no que xa non hai maiorías absolutas. Queremos recuperar os votos da xente que confiou no BNG en anteriores ocasións e contar co apoio da mocidade, da xente nova.

- Que tal é a relación cos seus socios de Sadamaioría e PSOE?

-Ben, todo é mellorable pero nas nosas áreas estamos moi contentos. Persoalmente noto moito apoio e respaldo, estamos contentos.

- Ao longo do mandato trascedeu máis dun desencontro con Sadamaioría: o plan xeral e o cese de Liss Becerra do Galp deixaron ao descuberto as súas diferenzas...

-Si, é que o BNG sempre foi unha forza que defendeu contundentemente certas cousas, hai certas cuestións que ideolóxicamente non podemos pasar polo filtro. Nós sabemos como foi a política municipal nos últimos anos e imos seguir defendendo certas cousas que cremos que non son beneficiosas para Sada aínda que nos custe votos.

- Como que?

-Pois moitas veces somos criticados polo tema do pazo de Meirás, por centrarnos tanto en iso, pero historicamente levamos anos reclamando. Non se trata de abandeirar a consecución, pero hai certas cousas que imos seguir reclamando polo ben do pobo en xeral

- A demanda da recuperación do pazo de Meirás cobrou forza neste mandato. A Xunta pro Devolución presentou xa unha proposta e a comisión de expertos da Xunta ultima o seu dictamen. Cre que lograrán que o pazo pase ao patrimonio público?

-Si, eu creo que si, de feito creo que houbo xa un cambio na sociedade. Hai dez anos, cando Abel López Soto iniciou os trámites para declarar o pazo Ben de Interés Cultural, era como un tema tabú, pero a día de hoxe a xente xa ten interiorizado que o pazo ten que ser devolto. A nivel institucional e xurídico creo se avanzou moito por parte da Deputación, da Xunta Pro Devolución do Pazo, no Parlamento Europeo con Ana Miranda? Creo que xa estamos noutro punto, e cando a sociedade asume un asunto é moito máis doado de acadar.

- Sorprendeulle a demanda dos Franco aos militantes do BNG?

-Si, paréceme incrible que teñan aínda máis que dicir, cando grazas a traballos como o de Carlos Babío e Manuel Pérez se veu a outra cara da verdade, unha verdade que ata agora estivo oculta.

- E pensa que a denuncia pode prosperar?

-Non o creo, foi algo simbólico. Penso que puxeron a denuncia para contrarrestar informacións que non lles conveñen.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es