O Servizo de Normalización Lingüística do Concello de Oleiros convoca o VII Premio Literario Descubrindo Oleiros, destinado a rapazas e rapaces de terceiro, cuarto, quinto e sexto de Primaria e de ESO, empadroados no municipio. A finalidade desta convocatoria, un ano máis, é fomentar o uso da lingua galega e ao mesmo tempo, dar a coñecer o municipio. Haberá un premio por cada categoría (son catro), que consisten en artigos electrónicos que promoven a creatividade, valorados nun máximo de 300 euros cada un.
Os escolares poderán presentar traballos, escritos en lingua galega, ata o 22 de decembro. Neles deben aparecer lugares do municipio, sexa en fotografías, imaxes, debuxos ou simplemente estar citados no texto escrito.
