O Pasatempo musicado de Caamaño & Ameixeiras e Rodrigo Cuevas

Un solitario e melancólico violín amansa ao León Colosal do Pasatempo de Betanzos no arranque do vídeo musical de Catro cousas, o tema co que Caamaño & Ameixeiras e Rodrigo Cuevas dan unha volta ao pasodobre tradicional para reivindicar o amor propio, a importancia de dicir «catro cousas» a tempo: «A intención é mandar á merda á xente que che trata mal», chancea Antía.

Caamaño & Ameixeiras, o dúo galego ligado á música e ao baile de raíz formado pola cantantes e instrumentistas galegas Sabela Caamaño (acordeón cromático) e Antía Ameixeiras (violín e voz), e o axitador folclórico asturiano Rodrigo Cuevas elixiron o parque enciclopédico brigantino como escenario do seu primeiro tema conxunto. O xardín histórico deseñado polos irmáns García Naveira co visto ou soñado nas súas viaxes ao redor do mundo serve de contrapunto perfecto para este tema inspirado nunha peza de Florencio, o cego de Vilares, reconvertida nun canto ao empoderamento.

Os corpos mutilados do conxunto escultórico Viaxe a Exipto serven de fondo a unha letra que invita a romper a tempo. Catro cousas hai no mundo que revolven o sentido, amar e non ser amado, querer e non ser querido. Se me queres amar, ama, se non, regálate ben, o mundo éche ben largo, non falta quen queira ben...

Foi Sabela Caamaño, natural de Oza dos Ríos, quen propuxo gravar en O Pasatempo,do que atesora moitas lembranzas. «É un lugar máxico, pelexamos unha chea para poder gravar aí», conta Antía Ameixeiras. O permiso fíxose de rogar, chegou un día antes da gravación, e no inicio da rodaxe «caeu o diluvio universal», pero mereceu a pena, relata esta artista. «Descubrimos un lugar marabilloso, que pena que non estea aberto e que a metade fose destruído», lamenta.

O videoclip dirixido por Jorge Rojas revisita este parque declarado Ben de Interese Cultural tras décadas de abandono e inmerso agora nun proceso de rehabilitación. O director recorre ao claroscuro para resaltar a súa beleza decadente e pon o foco nos seus recunchos e grutas. De branco e cunha coroa de flores, Cuevas e Caamaño e Ameixeiras pousan coas ninfas do Estanque do Retiro recentemente rehabilitado en esta peza que convida a non deixar pasar o tempo cun amor non correspondido.

Os artistas interpretarán o tema en directo por primeira vez o próximo 19 de decembro na Sala Capitol.