Antón Tenreiro toma posesión como concelleiro do BNG de Betanzos

Antón Tenreiro Ferreiro tomará posesión no pleno do Concello de Betanzos deste mes de xullo, completando así o grupo municipal do BNG. O novo edil nacionalista conta cunha dilatada experiencia na política local, pois foi concelleiro en Oleiros durante máis dunha década, e tamén formou parte do organigrama da vicepresidencia da Xunta, dentro do consorcio de Igualdade e Benestar.

En palabras de Tenreiro, volverá á primeira liña política "coa ilusión e a forza daqueles tempos e coa idea de sumar para o cambio que Betanzos necesita”.

O BNG reforza o seu grupo a menos dun ano das eleccións municipais, co foco posto na "preocupante xestión económica, na perda paulatina de servizos e de liderado e na errática xestión do Goberno local", tal e como indica o grupo.

Tenreiro amósase animado para traballar co fin de mellorar as cousas e ponse a disposición de toda a veciñanza de Betanzos para "cumprir coas súas necesidades".