O programa Sen código postal continúa a súa andaina por Galicia e hoxe visitará o concello de Sada, onde Víctor Fábregas fará entrega dunha nova carta en nome da Televisión de Galicia ( TVG). Coñecido xa polo seu papel de Liño, o empregado de Correos da serie Era visto da cadea pública galega, Fábregas convértese no Carteiro de TVG para dar a coñecer o máis sorprendente e descoñecido dos concellos galegos en Sen código postal.
O Carteiro da TVG contará, nesta ocasión, cun cicerone de excepción, Vicente Díaz, un veciño de Sada que se iniciou nos deportes náuticos aos once anos e que practicou, entre outros, remo e submarinismo. Víctor e el farán un percorrido pola vila mariñeira por excelencia, situada na ría de Betanzos e que conta con recunchos tan característicos e sorprendentes como as praias salvaxes, o barrio mariñeiro ou o modernismo.
Sen código postal conta cun vello coñecido de TVG, Liño, o carteiro de Era visto, un tipo peculiar e simpático, que sempre vai coa súa bicicleta, a súa carteira amarela e a súa peculiar gorra con anteollos. Agora está de volta para percorrer Galicia e levar unha carta a un veciño para que lle ensine os recunchos do seu concello e gáñese con iso o recoñecemento de embaixador.
O programa permitirá facer un paseo pola comunidade galega visitando os lugares e veciños máis descoñecidos, máis simpáticos, máis característicos e os máis sorprendentes, sempre ao xuízo dos recordos e viivencias dos nosos cicerones. O humor estará presente en cada un dos episodios e as bromas entre o presentador e os invitados marcarán o ritmo distendido deste programa.
