Sobre como foi 2025 no eido ambiental en Galicia

Estes últimos días de 2025 serven para facer balance do ano en moitos aspectos, tamén no ambiental. Deste xeito, desde o Grupo Naturalista Hábitat afirmamos que, en termos xerais, foi un ano aciago para o medio natural galego. Outro máis sen apenas noticias positivas.

As máis de 150.000 hectáreas de terreo calcinado durante o verán, en máis de 2.000 lumes rexistrados, foron unha enorme perda en termos de vexetación nativa pero tamén de fauna protexida e solo fértil. A moratoria ás novas plantacións de eucalipto activa desde xullo de 2021 demostrou ser un fracaso, con máis de 25.000 novas hectáreas desta especie exótica invasora na nosa terra. Precisamente, o descontrol doutras invasoras, como herbas da Pampa, flores de coitelo, avespas asiáticas ou caranguexos de río americanos, entre outras, acadan niveis moi preocupantes. Doenzas como a gripe aviaria e o botulismo —entre outras—afectan ás nosas aves, moitas delas protexidas.

A degradación actual do territorio galego pode aínda ir a máis, con decenas de novos proxectos industriais e mineiros lesivos co medio natural, como é o caso das celulosas da Ulloa e do lago das Pontes, as minas proxectadas en Touro e na Dorsal Galega e os parques eólicos no porto exterior de Arteixo e tamén no mar fronte ao cabo Ortegal. Especies emblemáticas como o lobo teñen a espada de Damocles da desprotección sobre elas e case todas as especies catalogadas como en perigo de extinción e vulnerables en Galicia seguen se plans de recuperación (ou de conservación) aprobados.

Este panorama escuro non chega a ser negro grazas á acción decidida da cidadanía máis comprometida coa conservación da natureza da nosa terra, que coa súa mobilización na rúa e as accións xudiciais están logrando frear (polo momento) gran parte da febre eólica, denunciando activamente o greenwashing de grandes empresas especuladoras e dificultando a macrocelulosa de Palas de Rei. No día a día, organízanse accións en favor do medio natural en toda Galicia: eliminación de invasoras, limpezas de lixo, compilación de datos de fauna e flora, charlas divulgativas, excursións abertas ao público, etc.

A custodia do territorio avanza e os micromecenados para combater xudicialmente proxectos ambientalmente aberrantes acadan deseguido os seus obxectivos. O G. N. Hábitat está orgulloso de ter contribuído ao longo de 2025 a mellorar a nosa contorna e o seu coñecemento, destacando as máis de 370 actividades organizadas nas que participaron máis de 15.000 persoas.

Conclusión: o G. N. Hábitat láiase outro ano máis do mal estado do medio natural galego, pero seguirá loitando pola súa conservación e restauración, incrementando a masa social crítica coas actuais políticas ambientais e organizando e apoiando iniciativas a favor da nosa biodiversidade. Só así se poderá albiscar un futuro menos sombrío para a nosa terra.

Suscríbete para seguir leyendo