Sanidade vacina aos nenos que compartían aula co neno falecido por meninxite

A Consellería de Sanidade puxo en marcha o protocolo de actuación contra a meninxite, vacinando os nenos que compartían aula na galescola co bebé dun ano falecido onte tras sufrir meninxite B, informou un voceiro deste departamento.

Un responsable da Consellería trasladouse esta mañá a Boiro para reunirse cos pais dos alumnos, que se atopan alarmados tralo ocorrido.

O bebé perdeu a vida no Hospital Clínico de Santiago a onde fora trasladado, tras serlle diagnosticado un caso de meninxite b.

Na galescola hai 97 nenos de ata tres anos, sete deles compartían a aula coa vítima.

O alcalde, Xose Deira, recoñeceu que o neno "a semana anterior xa estaba mal, e foi trasladado ao Hospital Comarcal do Barbanza, pero non evolucionaba e levárono onte ao Clínico pero morreu de forma fulminante".

Ás once chegou a Boiro Julio Garcia, xefe do Servizo de Promoción de Saúde da Delegación de Sanidade na Coruña, quen se reniu coa responsable da galescola e os pais para transmitirlle tranquilidade e explicarlle o proceso que deben seguir.

"Este caso non ten porque repetirse, xa que os nenos que estaban máis en contacto coa vítima foron sometidos a quimioprofilaxe e os demais están controlados, de haber algún síntoma tamén serán tratados, non é fácil contraer esta doenza, pero entendo a preocupación dos pais" sinalou García.

O bebé permaneceu no edificio dos servizos funerarios de Boiro ata as tres e media da tarde e posteriormente foi enterrado no cemiterio parroquial.

A galescola pechou as súas portas ás tres da tarde, pero mañá continuará as clases con normalidade.