O espazo A Revista Fin de Semana achegarase hoxe en directo á Festa do Queixo de Arzúa, declarada de Interese Turístico de Galicia, que celebra a súa 43ª edición. Ao longo desta primeira fin de semana de marzo, todos os asistentes poderán degustar este exquisito queixo, o máis producido e consumido en Galicia, e gozar coas grandes actuacións musicais programadas no festival que acompaña esta exaltación gastronómica desde as súas orixes e que este ano contará con Ilegales, Sidonie, No Craft, Rosa Cedrón e Son de Seu, entre outros. De volta no estudio de gravación, María Solar conversará coa blogger e experta en moda Natalia Alcayde, que comentará os estilismos da gala dos Mestre Mateo, e con Moncho Lemos, que falará da parte máis cinematográfica do evento e que fará as súas apostas sobre o que pode dar de si a 90ª cerimonia dos Premios Óscar, que se entregan esta madrugada.
