O programa Zigzag ofrecerá hoxe unha entrevista con Susana Seivane, herdeira dunha das familias con máis prestixio e fama dentro do mundo dos gaiteiros e artesáns de gaitas de Galicia. Seivane está a celebrar o 20º aniversario do seu primeiro disco, dúas décadas cheas de música, que a levaron a visitar máis de 20 países e a dar máis dun milleiro de concertos arredor de todo o mundo, coa vista sempre posta en Galicia e nas súas tradicións.
Pintura prehistórica
A presentadora do programa Pilar G. Rego tamén falará este mércores con Fran Alonso e Carlos Tejerizo, impulsores do descubrimento en Casaio, en Carballeda de Valdeorras, do maior conxunto de pintura esquemática prehistórica en Galicia. O equipo de Sputnik Labrego e Estela Arqueoloxía e Patrimonio documentaron unha das manifestacións pictóricas rupestres máis importantes do noroeste peninsular.
Por outro lado, o espazo da tvG2 entrará nos ensaios da nova obra do Centro Dramático Galego, Neorretranca e posmorriña, dirixida por Gena Baamonde e cun elenco integramente feminino. A peza baséase en dous textos de Ester Carrodeguas e Roi Vidal Ponte, que tratan en clave de humor a cuestión da identidade galega.
Ademais, Zigzag ofrecerá unha reportaxe sobre o espectáculo Movem Arcos, de Leo Arremecághona, unha unión de diferentes formas culturais para crear un proxecto anovador en que se produce unha fusión entre a música e a poesía.
