Aínda que o programa Larpeiros se despediu por vacacións, a deste martes seguirá a ser A Noite de Benigno Campos na TVG, que ofrecerá durante o verán este programa de produción propia para poñer en valor os máis de 30 anos do seu arquivo audiovisual. Campos será o primeiro dos persoeiros coñecidos que pasarán polo programa, ao que lle seguirán en vindeiras semanas actores como Marcos Pereiro, Miguel de Lira e Teté Delgado, entre outros.

Os espectadores poderán achegarse á historia persoal deste coñecido e televisivo cociñeiro, que conta cunha lexión de seguidores que gozan cada semana coas súas receitas no espazo Larpeiros, onde se emprega a cociña como escusa para entreter o espectador.

Desde Chapela, o seu lugar natal, e acompañado da súa muller e dos seus compañeiros no programa Tomás Alonso e Adrián Díaz, Benigno Campos comentará algúns dos momentos máis divertidos e curiosos da súa traxectoria na televisión, á que chegou por casualidade. Tomás e Adrián explicarán como é traballar con el e os espectadores descubrirán que a súa dona tamén é unha gran cociñeira.