25 de julio de 2019
25.07.2019

A TVG celebrará o Día de Galicia cunha gala especial presentada por Gayoso

A canle autonómica emitirá en directo a Ofrenda ao Apóstolo dende a catedral de Santiago

24.07.2019 | 20:29
Xosé Ramón Gayoso.

A Televisión de Galicia ( TVG) celebra esta noite o Día de Galicia por todo o alto, coa tradicional Gala do 25 de Xullo, con Xosé Ramón Gayoso como mestre de cerimonias. O presentador de Luar estará acompañado por Lucía Rodríguez, Alba Mancebo e Fran Cañotas, tres caras novas da Televisión de Galicia, aínda que moi populares xa para a audiencia da canle pública galega.

A gala dedicarase este ano ao traxe galego, con todas as tradicións e particularidades que leva parellas. Os presentadores vestiranse co noso traxe tradicional e polo escenario tamén desfilarán, ataviadas para a ocasión, caras coñecidas da TVG, como Nieves Rodríguez, Adrián Díaz, Paco Lodeiro, David Perdomo, Arturo Fernández, Patricia Fernández Santana e Rodrigo Vázquez, entre outros. En directo desde o Plató 1.000, a Gala do 25 de Xullo contará cun elenco de relevantes artistas galegos dos máis variados estilos, como Cristina Pato, a gaiteira galega máis internacional, gañadora dun Grammy; Luar na Lubre, unha das bandas de referencia da música folk galega; Rosa Cedrón, unha das voces máis recoñecidas do panorama musical galego; o grupo Baiuca, que mestura os sons tradicionais galegos coa electrónica e que presentará o seu proxecto de fusión xunto ás pandeireteiras de Aliboria, e a nova promesa da canción Sabela, natural das Pontes, que se deu a coñecer ao gran público tras o seu paso polo concurso Operación Triunfo.

O rock bravú estará representado polos Heredeiros da Crus, un grupo que marcou a historia da música galega. O programa tamén contará coa actuación doutra lenda viva do rock galego: a veterana banda de Cangas do Morrazo Astarot.

Tamén están convidadas a esta velada tan especial a cantante Lucía Pérez, que celebra 15 anos no mundo da música co seu novo álbum, Quince Soles; a banda viguesa de punk rock Killer Barbies; o cantautor Amancio Prada, que destaca pola súa contribución á difusión da lingua e da cultura galegas ao longo dunha traxectoria musical de máis de 40 anos; o cantante e actor ourensán Christian Escuredo e a orquestra Johnny Maquinaria, unha nova formación canaria que vén ao noso país coa ilusión de conquistar o público das verbenas galegas.

O amplo cartel musical desta noite completarase coas actuacións da artista arzuá MJ Pérez, do Coro Cantigas e Agarimos, do histórico grupo de música tradicional Treixadura, das cantareiras de Malvela, do grupo de percusión Odaiko, que actuará xunto a Nova Galega de Danza, e de Xestreu, un grupo de mulleres que coas súas voces fan un percorrido polos ritmos tradicionais, mergullándose no canto dos pobos.

Ofrenda ao Apóstolo

Horas antes, a TVG iniciará esta mañá coa Ofrenda Nacional ao Apóstolo Santiago unha variada retransmisión de actos conmemorativos do Día de Galicia no noso país. Coma cada 25 de xullo, a canle autonómica ofrecerá en directo este evento, que un ano máis lle dá continuidade á tradición instaurada por Filipe IV en 1643 e que nesta ocasión se celebrará na igrexa de San Martiño Pinario, debido ás obras no interior da catedral.

Compartir en Twitter
Compartir en Facebook

ESPECIAL

PREMIOS OPINIÓN MÚSICA RAÍZ

Premios Opinión da Música de Raíz

Consulta aquí a información dos premios de música do noso diario


Neomotor

Toda la información sobre el mundo del motor

Conoce las últimas tendencias y las novedades en coches, motos y la industria automovilística.