Chus Pato: “Os poemas de Xela Arias foron sempre dialéctica en repouso”

A segunda xornada do Simposio Xela Arias profundizou onte na voz poética da protagonista das Letras Galegas 2021 da man de dúas poetas de distintas xeracións, a académica Chus Pato e Alba Cid, e da crítica literaria María Xesús Nogueira, nunha mesa moderada pola escritora e tradutora Mercedes Leobalde. O serán, que arrincou cunha lembranza de Darío Xohán Cabana, falecido o mércores, rematará coa actuación da Banda da Loba, que no seu último disco, Hasme oír, converteu en cancións poemas da homenaxeada.

Sobre a visibilidade da obra da homenaxeada reflexionou Chus Pato, quen apuntou que a de Xela Arias foi unha obra “escasamente lida” nos anos nos que se publicou. “Hai obras que tardan en acadar a lexibilidade e este parece ser o destino dos libros da nosa autora. Os seus poemas foron sempre dialéctica en repouso, pero é agora cando ao achegarnos a eles comprendemos a marca do cognoscible”, afondou.