A Xunta premia a 77 alumnos polas súas ideas de negocio

Un total de 77 alumnos de 11 centros de Primaria e Secundaria de toda Galicia foron premiados este mes pola Xunta de Galicia no certame Atrévete a ter unha idea. O conselleiro de Educación, Román Rodríguez, gabou a calidade e a creatividade dos proxectos presentados e animou aos alumnos a seguir a senda do traballo e a responsabilidade. “Hai unha gran valentía en todas as vosas propostas, e é precisamente o valor o que debe levarvos a traballar para cambiar as cousas para mellor”, sinalou Rodríguez, que destacou a importancia de fomentar a cultura emprendedora desde o sistema educativo como vector de transformación do conxunto da sociedade.

Enmarcado no Plan Eduemprende, o concurso ten entre os seus obxectivos promover as competencias persoais e sociais, relacionadas co emprendemento, que fomenten un espírito crítico, proactivo e colaborativo entre o alumnado así como dar a coñecer aos estudantes o tecido industrial. O concurso conta con catro modalidades —individual Primaria e Secundaria e grupal Primaria e Secundaria— e son premiadas as tres mellores ideas de cada categoría. O alumnado galardoado recibiu un dispositivo dixital ou unha experiencia multiaventura.