Afundación e Abanca entregan máis de 2.600 xoguetes en Valencia

Abanca e Afundación entregaron nos últimos días máis de 2.600 xoguetes en varias localizacións da Comunidade Valenciana especialmente afectadas pola dana. Estes agasallos foron adquiridos polo banco e a súa Obra Social grazas ás doazóns recibidas a través da súa campaña solidaria do Nadal Dibujando sonrisas por Valencia.

Unha parte dos xoguetes repartíronse entre os alumnos e alumnas do CEIP Padre Manjón, situado na pedanía valenciana de La Torre; o CEIP Vicente Pla Paredes de Sedaví e os colexios Bertomeu Llorens i Royo e Paluzié, ambos os situados en Catarroja.

Trátase de tres localidades que foron devastadas polas riadas e cuxa cidadanía require dun gran apoio para ir retomando certa normalidade, especialmente nunhas datas tan sinaladas, segundo informa a entidade nunha nota de prensa.

O Centro Ocupacional La Torre, que xa tivo o apoio do banco e a súa Obra Social para poder retomar parte da actividade asistencial que realizan, recibiu outro lote de agasallos, e o resto entregáronse a Cruz Vermella, en oito ubicacións diferentes, e a Cáritas, que se encargarán agora de distribuílos entre as familias damnificadas para que polo menos os máis pequenos poidan manter algunha das tradicións do Nadal máis arraigadas a pesar da situación crítica que están a vivir.

A campaña solidaria do Nadal de Abamca e Afundación permanecerá activa ata o próximo 31 de decembro a través da web dibujarsonrisas.abanca.com, onde se poden seguir realizando achegas.

Os fondos recadados a partir de agora destinaranse aos proxectos que teñen en marcha na zona Cruz Vermella e Cáritas, dúas organizacións coas que o banco colabora desde o primeiro momento e que coñecen ben as necesidades máis urxentes xa que traballan sobre o terreo.

Tamén é posible seguir realizando donativos con este fin mediante transferencia á conta solidaria habilitada por Abanca ES80 2080 7208 3385 3000 7122.

Tracking Pixel Contents