Baixo as estrelas da Vía Láctea

¿Sabías que o Camiño de Santiago tamén se coñece como o Camiño das Estrelas? 

Segundo algunhas fontes, a súa orixe está na equiparación do Camiño de Santiago coa liña esbrancuxada de estrelas que forma o brazo da Vía Láctea visible dende a Terra e que, como a Ruta Xacobea, semella estar orientada na dirección leste-oeste.

A maiores, unha antiga lenda conta que a Vía Láctea sinalaba o lugar onde estaban os restos do Apóstolo Santiago.

Tamén se di que os peregrinos, dende hai séculos, se orientaban seguindo esa banda de luz no ceo, que marca o camiño cara ao oeste e servía de guía natural nas noites despexadas.

O espírito da viaxe

Francisco Sánchez Brea, alumno de 3º e 4º de Educación Primaria no CPR Mª Inmaculada de Marín, escolleu ese título para o seu debuxo, onde representa a un peregrino visto de costas, avanzando polo camiño cunha mochila cargada de detalles: botas, unha cociña portátil, unha cuncha, mapas, sinais e mesmo un bordón.

A súa obra é colorida, simpática e chea de elementos que contan como é a experiencia de facer o Camiño: o que se leva, o que se atopa e o que se ve. O bordón serve de apoio, a mochila leva o imprescindible e a frecha amarela sinala a ruta, como antes o facía o ceo estrelado.

Un debuxo que resume, con sentido do humor e moita atención ao detalle, o espírito da viaxe: avanzar paso a paso, ben equipados, e con Compostela sempre no horizonte.