Novo plan de lectura, escritura e acceso á información da Xunta

A Xunta conta cun novo Plan de lectura, escritura e acceso á información, unha iniciativa que forma parte das liñas previstas no Plan MEGA de mellora educativa de Galicia para o reforzo da competencia lectora, e que vai acompañada do apoio dun equipo de mentoras que se distribuirán por toda a xeografía galega para coordinar, asesorar, acompañar e dar formación neste eido. O plan inclúe a introdución este curso, como novidade, dun tempo mínimo de lectura diaria en Primaria, de entre 20 e 30 minutos. A maiores, tamén se recomenda dedicar un tempo específico á lectura dentro da xornada lectiva en Educación Infantil, ESO e 1º de Bacharelato.

O obxectivo principal é mellorar a competencia lectora e fomentar o pensamento crítico, ademais de impulsar a produción de textos escritos, promover a aprendizaxe en distintos formatos e consolidar as bibliotecas escolares como espazos de recursos clave.

O novo plan conta cunha vixencia de catro cursos escolares, reforzará o traballo que os centros educativos galegos veñen desenvolvendo neste ámbito e estará sometido a un proceso continuo de avaliación e actualización co fin de incorporar as melloras que xurdan froito da experiencia e das recomendacións do equipo de mentores.