Unha cidade de tinta e ficción
Antonio Tizón abre este sábado a nova edición de 'Paseos pola Coruña Literaria', catro rutas pola urbe da man dos autores que escribiron sobre ela
Non son moitos os que pensan, nos seus paseos pola cidade, que están a camiñar no escenario dunha novela. Porén, iso é o que acontece cando se percorren zonas como María Pita, a Cidade Vella ou os Xardíns de Méndez Núñez, espazos intimamente ligados á literatura galega, que remata por situar neles as súas tramas e personaxes. Antonio Tizón, Diana Varela, Olga Patiño e Antía Yáñez son algúns dos autores que fixeron da Coruña unha urbe de tinta. O vencellamento das súas obras con ela o explorarán desde este sábado cos Paseos pola Coruña Literaria, unha serie de rutas guiadas polos propios creadores e organizados pola Asociación de Escritores en Lingua Galega (AELG) e o Servizo de Normalización Lingüística.
Os percorridos viaxarán polo pasado da cidade, amosando a súa evolución política e sociolóxica como parte da edición de outono da iniciativa. O coruñés Antonio Tizón será o encargado de inaugurala o día 8 da man de Un home estraño, a súa última novela, coa que analizará a situación da urbe durante os primeiros pasos da democracia. "Falarei da parte histórica que eu coñezo daqueles anos 80, e de como foron mudando a política e os escenarios", conta o autor sobre o percorrido, que dará comezo, como todos, ás 12.00 horas.
A estatua de Curros Enríquez en Méndez Núñez, a xamonería La Leonesa, ou a casa dun dos protagonistas da obra na praza de Santo Domingo serán algunhas das paradas da ruta, que fará tamén un alto obrigado na praza de María Pita. "É o símbolo de como cambiou a cidade desde entón ata agora, non ten nada que ver co que era antes", asegura Tizón, que rematará o itinerario coa proxección dun book trailer do seu volume na libraría Arenas.
A viaxe ao pasado que realiza irá moito máis aló con Diana Varela, que tomará un punto de vista feminista no seu percorrido. A poeta e narradora, afincada desde hai tempo na Coruña, protagonizará o sábado 22 o paseo Mulleres donas do seu soldo, unha ruta coa que rescatará do esquecemento á biografía de moitas figuras femininas que deixaron unha pegada determinante para a historia da cidade. "Centrarase en mulleres tan representativas como Rosalía de Castro, Concepción Arenal ou Emilia Pardo Bazán, que romperon cos estereotipos e loitaron por conseguir moitos dereitos", explica a secretaria xeral de AELG, Mercedes Queixas, que vencella a temática da ruta coa deseñada por Antía Yáñez arredor de Senlleiras. A escritora remontarase aos anos 30 co seu itinerario, co fin de dar conta dos avances tan "cativos" obtidos especialmente na situación da muller. "Parece o pasado, pero estase a reproducir no presente", indica Queixas, que sinala cuestións como os prexuízos lingüísticos ou o xermolo do nacionalismo galego como outros dos asuntos que abordará o 20 de outubro a autora.
Antes, o día 6, terá lugar o paseo con Olga Patiño. A Cidade Vella será a grande protagonista do percorrido da poeta, que fará "unha ruta moi íntima" con paradas "en espazos que remiten" aos seus versos. A inscrición para asistir a ela poderá facerse a partir do 24 de setembro, de xeito gratuíto -xa sexa por teléfono, correo electrónico ou de modo presencial- no Centro Ágora. Os mesmos trámites teranse que seguir para apuntarse ás rutas de Tizón (aberto desde onte), Varela (desde o 10 de setembro) e Yáñez (desde o 8 de outubro), que pechará a edición co seu paseo.