“Todos somos turistas, pero ninguén se quere sentir turista”
“Para que haxa un teatro alternativo ten que haber teatro comercial”
O teatro chega por primeira vez ao EMHU conGo Home, a obra dirixida por Tito Asorey que estará o 1 de maio no Teatro Colón. Entre risas, o director fala desta peza, que aborda o turismo nunha mestura de thriller e comedia negra. “A risa moitas veces ten ese punto necesario de crueldade, na peza hai bastante destrución”, avanza.
A nova peza que dirixe, Go Home, forma parte do EMHU, un encontro con moi boa acollida. A que cre que é debido?
A Coruña é un sitio onde o público creo que responde moito. Cando se presenta aquí una obra na que eu estou sempre ten moitísima aceptación. Hai empresas e compañías que levan moito tempo traballando e se fidelizou un público extraordinario. O humor tamén chama á xente, temos ganas de rir e ganas de encontrarnos.
Houbo que esperar catro edicións do EMHU para que chegue o teatro.
E eu encantado, nunca é tarde. Oxalá sexa a primeira de moitas.
Temos os galegos e galegas un bo sentido do humor?
Moitísimo, e moi propio. A retranca está aí, evidentemente, pero fora dese tópico Galicia é terra de humoristas extraordinarios. Tamén hai moitos humoristas contracorrente, que é importante. E ese humor negro, que tamén nos caracteriza.
Precisamente o humor negro caracteriza a Go Home, non?
E moi negro por moitas veces (rí). O humor é unha maneira extraordinaria de reflexionar sobre o noso mundo e, por que non, de facelo dunha maneira crítica sobre como se está movendo.
Por que elixiu o turismo como tema central da obra?
Eu creo que é un temazo, que eu vivo en Santiago (ri). Moitos lugares están pasando a vivir do turismo e iso causa moitos beneficios económicos pero hai algo que cambia neses lugares. Eu como habitante de Santiago vexo como está cambiando a cidade. Hai algo de disneyficación no turismo. Todos somos turistas e todos participamos desta problemática, pero ninguén se quere sentir turista. Queremos ter una experiencia o máis cercana posible á realidade pero iso é cada vez máis difícil. A peza reflexiona un pouco sobre iso. É moi divertida, ten moitas capas de significado e é para todos os públicos adultos (e volver ir).
Só adultos?
É unha peza por veces forte, moi intensa para os actores. Están durante a hora e pico que dura a función traballando con moita intensidade e dunha maneira moi divertida. É un humor físico, por veces, tamén. A risa moitas veces ten ese punto necesario de crueldade, na peza hai bastante destrución.
Destruír... para construír?
Estou seguro que é para construír. O teatro ten esa capacidade de axudarnos a construír novas realidades.
Está poñendo moita cara de pillo falando da obra...
Téñolle moitas ganas a esta peza. É un texto actual que dálle un valor específico con esa comedia negra que a min me fai moita ilusión facer, divírteme moito. É desas cousas que riste, pero non sabes se fas ben ríndote diso. Pero estaste rindo da crueldade, ou da violencia incluso, dunha situación extrema.
Pode sentirse entón incómodo o espectador?
Queremos que o espectador se sinta sempre ben e divertido. Pero o tema que se trata si que dá de falar. É unha maneira de ver o turismo que ao mellor non é a que estamos acostumados. Temos unha semana libre e xa estamos vendo a onde imos, parece de obrigatoriedade, de facer un check nunha lista.
Coma eses mapas nos que rascas os países que xa visitaches.
Exacto. A min iso fascinábame. Eses mapas era unha das cousas que eu tiña na cabeza. Levo cinco ou seis anos vivindo en Santiago e non a coñezo. Dende que vivo alí quitáronseme moitas ganas de viaxar. Cando eu saio fóra teño a mesma cara de despiste? Cómpre una reflexión sobre o turismo, e neste caso dunha maneira artística, cómica e divertida.
Goza de boa saúde o teatro galego?
Eu creo que si, hai propostas moi interesantes. Está nun momento de potencia, no que é quen de encher teatros. A xente ten que ver o teatro como unha forma de ocio, sexa comercial ou alternativo. Pero penso que para que haxa un teatro alternativo ten que haber teatro comercial. E teatro comercial bo, con bos textos que falen de temas que interesen.
Temas
Más en A Coruña
-
Baiuca, Carlangas y Mudhoney, primeros confirmados para el Noites do Porto de A Coruña
-
Los festivales que no te puedes perder este verano cerca de A Coruña
-
Comienza la instalación de pantallas gigantes en Riazor para seguir los partidos del Dépor y el Leyma Coruña
-
La duna de Riazor contra los temporales empezará a desaparecer el próximo lunes