A Televisión de Galicia estrea esta noite a serie ‘O Faro. O reencontro’
A historia dos Peña e dos Muñoz regresa á canle autonómica
A historia dos Peña e dos Muñoz regresa á Televisión de Galicia (TVG), que con O Faro. O reencontro recupera para o gran público os protagonistas da ficción que hai anos conseguiu cativar durante 510 episodios unha ampla franxa da poboación galega e doutras comunidades autónomas, particularmente a catalá. A serie O Faro, que ademais foi emitida noutros cinco países, creou un forte vinculo cos espectadores e unha audiencia crecente e constante que chegou a acadar, no último capítulo, un 20’5% de share en Galicia.
Misterio, intriga, amor e humor son os ingredientes que compoñen este reencontro e que farán que os espectadores da TVG vivan semana a semana as emocións máis intensas. O Faro. O reencontro está formada por dez episodios de 50 minutos. A serie, que volverá emocionar e conmover a partes iguais, ofrecerá novas tramas con orixe no pasado e cun punto do xénero thriller.
Nesta nova etapa do serial, que esta noite se estrea na TVG con capítulo dobre, ademais de contar con Raquel Espada e Fernando Tato nos seus papeis protagonistas de Lucía e Ricardo, os espectadores tamén volverán ver a Belén Constenla, María Mera, Susana Sampedro e Adrián Castiñeiras, entre outros. Tamén se unirán ao elenco novos personaxes, que van ter moito que dicir nesta nova temporada.
O Faro. O reencontro comeza anos despois do punto en que quedara a serie. Os protagonistas volven verse as caras con motivo da ansiada voda dos seus protagonistas: Lucía e Ricardo, que os convocan a cada un por separado, o que resultará nun reencontro sorpresa para todos eles. Xuntos compartirán dous días de celebración que se presentan como un oasis de calma entre os conflitos cotiáns.
Temas
Más en Televisión
-
'El hormiguero' recibirá la próxima semana a un expresidente y a cantantes internacionales, entre sus invitados
-
Así fue la carrera de Ion Aramendi como jugador de baloncesto profesional: "Fui muy feliz"
-
Berto Romero: "Los chistes pueden ser muy peligrosos. Por eso me pienso lo que digo"
-
Jorge Fernández comparte por primera vez una fotografía con su pareja