‘Xente Marabillosa’ aborda o dereito ao esquecemento das persoas que tiveron cancro

Xente Marabillosa chega esta noite cun sétimo programa (TVG, 22.40) centrado nos prexuízos que sofren as persoas que, tras ter superado un cancro, atopan problemas á hora de reincorporarse ao mercado laboral. O pasado ano en Galicia diagnosticáronse 19.932 pacientes de cancro. A pesar da alta incidencia desta enfermidade, cada vez existen diagnósticos máis precoces que permiten que a esperanza de curación aumente e tamén, consecuentemente, que melloren os procesos de recuperación... pero a sociedade non sempre o entende así.

Lucía Rodríguez recibe no estudio de Xente Marabillosa a unha madriña que leva máis de vinte anos comprometida coa loita contra o cancro: a modelo, presentadora e escritora Paloma Lago, que falará da súa faceta máis solidaria. A presentadora ferrolá colabora coa Asociación Contra o Cancro e a Fundación Naru, que apoia de xeito económico a persoas que superaron un cancro.

Para denunciar a discriminación dos que pasaron por esta doenza, estréase unha nova entrega da cámara oculta onde unha expaciente oncolóxica lista para volver traballar é cuestionada e desprezada polo novo xerente. Atópase coa desagradable sorpresa de que non a queren volver contratar.Esta cámara oculta, que conta co asesoramento da Asociación Contra o Cancro, baséase nesta ocasión na experiencia persoal da coruñesa Carolina Pan, unha coñecida cantante e tiktoker que afrontou o seu diagnóstico, un cancro de mama, difundindo e compartindo a súa evolución. Outra cámara oculta será protagonizada pola prestadora Trisha Fernández.