Os Países Baixos e a privatización de AENA

Se un fai balance do debut de España no Mundial de fútbol de Brasil, non hai mellor palabra para definir ese debut que "demoledor". Claro que si ese 5-1 ponse en números romanos V-I e os xuntamos quitándolle o guión resulta VI. Felipe VI. Outra vez a monarquía española derrotada polos Países Baixos. Bromas aparte o certo é que Holanda estaba enrabietada pola pasada final do Mundial de Sudáfrica, mais tamén polo que na historia do seu país representan os españois. Para un holandés nomearlle o duque de Alba é como mentarlle ao demo. Se ata teñen un home do saco que é español, para meterlle máis medo aos nenos. E aínda que o trato entre as persoas de ambos países laminou bastante o paso dos Tercios de Flandes polos Países Baixos, o certo é que algo subxace na memoria colectiva holandesa. O que si veu ben da derrota do pasado venres é que de non producirse esta, a noticia da privatización de AENA pasaría desapercibida. Hai que lembrar que AENA estaba sendo rendible. Non nos vaia pasar como aos británicos cos seus ferrocarrís. Tiñan a rede ferroviaria mellor do mundo, mais chegou dona Margaret, a dama de ferro, e privatizounos. A xestión foi tan mala que anos despois houbo que facelos outra vez públicos. E agora que dan ganancias e que volven ser absolutamente puntuais chega Cameron é propón privatizalos de novo. Dubido moito que a privatización de AENA vaia xerar máis empregos e máis cartos. Por certo, que pasando moi por riba do asunto, Ana Pastor, a ministra de Fomento, deixou caer a posibilidade de privatizar algunhas liñas de Renfe. Seguro que serán as máis rendibles, as que non dan un pataco serán as xestionadas polo Estado. Ademais, pasada xa a obsesión dos AVE, Renfe ten unha débeda cos trens de "cercanías", eses que vertebran verdadeiramente os territorios. Sen eses trens condenamos a moitos pobos e vilas ao ostracismo, e aos seus veciños á soidade e a ter que mercar un coche para tentar fuxir dela. Malos tempos para o transporte público en España e mormente en Galiza. Claro que sempre nos queda derrotar a Chile e a Australia. Daquela volveremos esquecer estes outros problemas.