Xerais supera os dez millóns de exemplares vendidos dende a súa fundación en 1979

Xerais leva 32 anos e posúe un catálogo histórico de máis de 3.000 títulos, así como un catálogo vivo de 1.500 obras que abranguen os ámbitos da narrativa, literatura infantil e xuvenil, ensaio, dicionarios, etc. A empresa vende uns 300.000 exemplares por ano, o que Bragado considera "un éxito por parte dos lectores de Galicia ao longo destas décadas".

Das 125 novidades publicadas por Xerais nas distintas coleccións destacaron, entre outras, a novela de Agustín Fernández Paz Non hai noite tan longa, con máis de 3.500 exemplares vendidos e a edición dos contos reunidos de Manuel Rivas no volume O máis estraño, con casi 4.000. Os responsables da editorial destacan a interese que espertou entre os lectores a figura de Lois Pereiro (homenaxeado nas Letras Galegas 2011), xa que a súa Poesía completa foi un dos libros máis vendidos das novidades publicadas por Xerais.

A literatura infantil e xuvenil ocupa un lugar destacado na oferta editorial galega, e os autores están recoñecidos cos máis importantes premios. Tal foi o caso de Agustín Fernández Paz, que recibiu este ano, na Feria Internacional del libro de Guadalajara (México), o Premio Iberoamericano SM de Literatura Infantil y Juvenil. Asemade, desde Xerais destácase o sorprendente comportamento que tivo a reedición da novela infantil de Xabier P. Docampo O misterio das badaladas, que acadou tres edicións o ano pasado. Seguíronlle as novidades Corazón de chocolate. Unha aventura para Tintimán en Compostela, de Santiago Jaureguizar; A chave da Atlántida, de Anxo Fariña (Premio Merlín, 2011); Lois Pereiro. Náufrago do paraíso, de Marcos Calveiro, y A filla do ladrón de bicicletas, de Teresa González Costa (Premio Merlín, 2010).

Edicións Xerais destaca tamén as ventas do fondo editorial con títulos que se reeditan ano tras ano e acumulan un número moi importante de exemplares vendidos, como sucede con novelas como O lapis do carpinteiro, de Manuel Rivas, con 81.200 copias, ou Cartas de inverno, de Agustín Fernández Paz, con casi 81.000.

Entre os máis vendidos deste ano están O pintor do sombreiro de malvas, de Marcos Calveiro; Asasinato no Consello Nacional, de Diego Ameixeiras; Resistencia, de Rosa Aneiros; Todo é silencio, de Manuel Rivas; O único que queda é o amor, de Agustín Fernández Paz; Dragal, de Elena Gallego; Cando petan na porta pola noite, de Xabier P. Docampo, ou Pel de lobo e Morning Star, de Xosé Miranda.

O libro estrela da editorial segue sendo o Pequeno dicionario Xerais, con máis de 350.500 volumes vendidos. "É o noso buque insignia, e tamén o Dicionario Xerais da lingua, que chegou aos 200.000 exemplares este ano, algo extraordinario", declarou Bragado, que afirma que a editorial Xerais é, a miúdo, identificada como "a empresa dos dicionarios, algo que é mérito do equipo de lexicógrafos que coordina Xosé María Carballeira".

Dificultades

A pesar deste éxito nas vendas, Manuel Bragado recoñece que nos últimos anos produciuse unha diminución na recaudación, debida á crise económica e a outros factores como o paradigma da comunicación impresa e dixital, a homoxeneización en canto aos libros preferidos polo público e ás políticas lingüísticas adoptadas pola Xunta.

"Fundamentalmente no eido educativo sentimos os efectos do actual decreto de plurilingüismo, non somos alleos ás dificultades nas políticas de fomento da lingua e somos partidarios da recuperación de consensos socializadores para acadar unha atmósfera máis favorecedora para a nosa actividade", comentou o director de Xerais, que considera que "o libro en galego está nunha situación de profundísima mudanza, o que crea incertezas e obriga a explorar novas fórmulas". "A oferta de Xerais ten que ser completa e diversa, a biodiversidade é importante", concluíu Manuel Bragado.