Pedro Lamas Director musical de Axada

"A nosa banda realiza versións, mais ten unha identidade propia"

"Á hora de facer arranxos mantiven as mesmas coordenadas que hai cinco anos e os instrumentos son os mesmos"

11.05.2016 | 09:40
Pedro Lamas, realizando unha presentación durante un concerto.

O seu nome pode non resultar coñecido para o gran público, mais no ambiente musical o prestixio acadado por Pedro Lamas non para de aumentar e vese reflectido nas importantes encargas que vai tendo para exercer como director musical, un traballo para o que se adoita recrutar a xente moi cualificada e talentosa. Pedro Lamas é o cerebro que deseña e move a sonoridade de Axada, cuns arranxos imaxinativos de pezas xa coñecidas doutros artistas

Co gallo do décimo aniversario dos PREMIOS OPINIÓN, o xornal decidiu impulsar unha iniciativa especial para festexar esa data. A idea foi a de crear unha banda para que interpretase pezas de discos que foran galardoados en anteriores edicións do premio. Dese xeito naceu Axada, a palabra significa vento forte, unha formación singular polo infrecuente número de membros da formación (dez) e por contar cunha potentísima sección de vento, composta por catro músicos. No último lustro vemos que se van engadindo este tipo de instrumentos a proxectos nados en Galicia con ligazón a este tipo de música, mais Axada foi unha banda pioneira na apertura a esas sonoridades.

Nesta décima quinta edición volveremos contar con eles no escenario e interpretarán, ademais dalgunha composición que xa soara no seu debut escénico, a súa versión das pezas que acadaron o premio ao mellor tema orixinal nas últimas edicións do galardón, xusto dende que mudou o formato de elección.

O saxofonista e gaiteiro Pedro Lamas non para de enlazar proxectos grandes, nos que está rodeado dunha chea de músicos, e manifesta que está moi ledo "por poder facer reais soños que anos atrás non sabería nin como comezar".

-Que significa para vostede ser director musical de Axada?

-Considéroo un auténtico privilexio. Entre outras cousas dáme a oportunidade de tocar con grandes músicos cos que non o podería facer noutras circunstancias.

-Que sensacións ten cinco anos máis tarde de facer o debut con este proxecto?

-Tanto daquela como agora as sensacións son moi boas. Hai cinco anos foi unha sorpresa para o público atoparse diante dunha banda destas características, que facía algo diferente con temas que xa resultaban coñecidos para eles.

-O concepto é semellante ao daquela ou existen diferenzas?

-Nesta ocasión o repertorio condicionou un chisco, xa que debiamos facer as pezas elixidas como mellor canción orixinal dos últimos anos, pero á hora de efectuar os arranxos mantiven as mesmas coordenadas e os instrumentos empregados son os mesmos que os da primeira vez. Pretendemos facer reinterpretacións que teñan unha identidade propia. Contamos cunha compoñente moi visible na formación, xa que temos a catro músicos na sección de ventos que aportan diferentes timbres.

-Tamén contan coa cantante Begoña Lorenzo e outros cinco músicos de categoría para completar a banda.

-Temos unha sección rítmica impresionante e xente que é coñecida por liderar grupos. Begoña Lorenzo vai facer propios os temas concibidos orixinalmente para outros artistas. Somos un conxunto singular e moi ben sincronizado.

-Que foi o máis complicado de facer?

-Pois cadrar a axenda dos músicos (sorrí). É un reto afrontar temas cunha estética diferente e tentar unificalos para un grupo baixo un mesmo criterio. Cómpre pensar que adaptamos pezas que, por exemplo, interpreta un trío e agora debe ser revisada para que toquen nove instrumentistas, o que nos permite contar cunha ampla parcela harmónica e tímbrica. É algo que me encantou facer.

-Que van presenciar os espectadores que vaian á gala?

-Unha formación pouco cotián, ao sermos dez músicos, que realiza unha revisión do repertorio folk destacado da última década. Serán corenta minutos que creo van pasar axiña para o público e desexo que os abraiemos coa proposta.

-É o encargado da dirección musical no exitoso espectáculo O poder do arcabuz. Como foi esa experiencia?

-É unha das propostas máis interesantes que me chegaron na miña andaina musical. É outro reto, ao contar con vinte músicos á miña disposición e un coro. Falamos dun espectáculo de danza ideado por Henrique Peón, ao que lle agradezo que confiase en min, no que a música debía estar moi coordenada co baile. Paréceme que se fai unha visión da historia dos irmandiños moi interesante.

Compartir en Twitter
Compartir en Facebook

Lotería del Niño 2014

Comprobar Lotería del Niño

Toda la información de la Lotería del Niño. Comprueba los números premiados con nuestro widget de la Lotería del Niño.

 
Enlaces recomendados: Premios Cine