O programa Grandes Orquestras de Galicia da Televisión de Galicia (TVG) estará hoxe dedicado á París de Noia, formación que, con máis de seis décadas de traxectoria nos campos da festa, prazas e pavillóns de toda comunidade galega, achegan este verán unha conxunción de baile, música e espectáculo que semella imposible.
Os seus cantantes, músicos e bailaríns non teñen ningún medo ás alturas e combinan os temas máis escoitados deste verán cos éxitos de onte e de hoxe ao son dun ritmo imparable e unha posta en escena impactante.
Nesta edición de Grandes Orquestras de Galicia os espectadores saberán de primeira man que ocorre nos camerinos da París de Noia. O programa da canle autonómica falará co seu líder, Blas, que a causa dunha lesión non pode actuar pero que acompaña a orquestra en todas e cada unha das súas actuacións. Ademais, preguntaralle ao público se coñece realmente de onde vén o nome desta formación de tan longa tradición e dará testemuño dos fans e seguidores máis acérrimos da París.
Inicios
A orquesta París de Noia naceu en 1957, ano en que Joaquín García Piñeiro, coñecido como El Acordeonista, asumía o mando dunha orquestra de unha ducia de compoñentes xunto a Constantino Pego, El Gitano, animador das verbenas galegas aló onde estiveran, tanto na comunidade galega coma fóra dela.
