Nin Xosé Filgueira Valverde, nin Carlos Casares, nin Ben-Cho-Shey. Ningunha destas candidaturas prosperou. Nin a do poeta berciano Antonio Fernández y Morales, tan querido ao presidente da Real Academia Galega (RAG), Xosé Luís Méndez Ferrín, que o propuxo unha vez máis. Ao final dun longo debate entre os académicos, impúxose no pleno o nome do dramaturgo Roberto Vidal Bolaño para ser homenaxeado o Día das Letras Galegas 2013.

A candidatura de Vidal Bolaño (Santiago de Compostela, 1950-2002) chegou ao plenario da RAG avalada por nomes como o doutro dramaturgo, Euloxio Ruibal, ou da catedrática de Comunicación Audiovisual Margarita Ledo, que fixeron onte un encendido eloxio da súa figura.

Tamén recibiu o pasado xoves o apopio público de medio centenar de asociacións e institucións dos ámbitos escénico e cultural, ademais de oitocentas firmas.

"É unha figura imprescindible para comprender a dimensión do teatro galego e, xa que logo, do noso sistema literario", segundo a Academia, que destacou a prolixa produción literaria de Vidal Bolaño, "sempre orientada a armar un edificio teatral galego perdurable".

A produción de Vidal Bolaño "caracterízase por un irrevogable compromiso coa lingua galega, pois estamos ante un autor radicalmente monolingüe, que contribuíu á definitiva instalación do teatro galego na nosa lingua. Ademais, hai na súa obra un inequívoco compromiso estético. Todos os estudosos coinciden en salientar a súa constante preocupación pola experimentación, por dialogar coa tradición culta e popular, literaria e histórica, social e política", sinalou a RAG. "É considerado un dos dramaturgos europeos máis importantes do último cuarto do século XX", engadiu.

Non é soamente un home de teatro (traballou na produción, dirección á iluminación). Tamén foi "un excelente actor e un dos pioneiros da produción audiovisual en Galicia". O seu traballo como director e como guionista, aínda que non chega á dimensión do seu labor dramático, tamén merece unha consideración especial polas liñas que deixou trazadas para o desenvolvemento dun campo audiovisual galego, sostén a Academia.

Vidal Bolaño é autor de obras como Laudamuco, Señor de Ningures (1976), Bailadela da morte ditosa (1980), Agasallo de sombras (1992), Días sen gloria (1992), Saxo tenor (1993) ou As actas escuras (1994), a meirande parte delas levadas aos escenarios.

O plenario da RAG acordou así mesmo nomear académico de honra electo a Arcadio López Casanova e académicos correspondentes a Xosé Manuel González Herrán, Luz Méndez, Fernando Ramallo Fernández, Olivia Rodríguez González, Goretti Sanmartín Rei e Xavier Vence Deza.