Amiña xeración medrou entre noticiarios da guerra de Vietnam a alunizaxe do home na lúa e Os Picapedra. Ao meu amigo Pepe, aquilo de Vietnam marcouno, e tivo sempre a obsesión de coñecer o país asiático. Tamén porque Pepe é un coruñés moi singular. Non quere problemas. A crise non existe en realidade. Somos nós os que negativizamos todo e así nos vai. Hai uns días Pepe e máis eu atopámonos no Obelisco. Eu coas miñas muletas e a miña máscara e el coas súas maletas de eterno viaxeiro a ningures.
-Ola. Canto tempo. Como vai?
-Acabo de chegar de Vietnam. Que país, chico, que país. Moito temos que aprender.
-Seguro.
-Nada que ver con isto, eh? Son moi diferentes. Os tailandeses?
-Vietnamitas, non?
-Que? Ah, si. Vietnamitas. Que máis ten? Son todos chineses.
-Todos?
-Si, todos. Teñen os ollos así, como oblícuos.
-Que cousas.
-Escoita, home. Os coreanos comen de todo. Alí non hai problema. Papan un canciño ou un rata sen escrúpulo ningún. Por iso non hai crise e non andan todo o día con queixumes. Os españois temos moito que aprender dos camboianos.
-E dos indios.
-Iso non o sei. Eses non teñen os ollos oblícuos.
-E como che vai?
-Xa che digo, acabo de chegar de Vietnam.
-E a familia?
-A familia?
-Si, a túa nai estaba enferma, non?
-Si, estaba. Morreu cando estaba en Tailandia. Que país, chico, que país. Enorme. Máis grande que Coruña. Unha inmensidade. Xa estou desexando volver aló.
-E iso?
-Namorei. Unha rapaza marabillosa, cos ollos oblícuos.
-Ousexa que o teu é como o de Ana e o rei de Siam pero á inversa?
-O rei de que?
-Nada, cousas miñas.
-Que país, chico, que país.
-Cheo de siameses, supoño.
-Pero de que falas? Se o dis polos gatos, que saibas que alí tamén os comen.
-Que voracidade.
-Teñen outra cultura. Ao final todo é cuestión de cultura.
-Claro, Pepe, claro. Cuestión de cultura. Que vaia todo ben, e xa nos vemos, eh?
-Si, nos vemos. Ciao, amargado.
Por suposto, Pepe, non reparou nas miñas muletas, nen na miña máscara. Se cadra pensou que estaba doente e non quixo molestar. En Vietnam non hai crise, e ao mellor non hai enfermos, e se cadra non morren as nais. Calquera día Pepe viaxará á lúa ou aparecerá como invitado estelar nun episodio de Os Picapedra. É imprevisible.
