O percebe esperta sempre moito sentimento de orgullo nos portos onde se traballan. Para todos o seu percebe é o mellor. Pero para Pescadores de historias o máis importante é o percebeiro e a percebeira, e aínda que toda a costa galega é mar de bos profesionais, o espazo estará hoxe en Aguiño, un porto onde se atopa un destacado colectivo.

Aguiño, na ría de Arousa, ten no percebe o recurso máis destacado da súa confraría e a súa lonxa é a que máis percebe comercializa de Galicia: anualmente pasan das 30 toneladas de percebe e traballan este recurso 180 homes e mulleres. E a súa festa do percebe destaca entre todas as festas gastronómicas de Galicia. O traballo do percebeiro é un dos máis arriscados do mar, porque traballa na rompente, onde o mar case nunca descansa.

Pescadores de historias irá ás rochas percebeiras para falar con Concha Ramallo, coa súa filla Miriam Paz, con Ciprián Parada e con José Caneda. Tamén conversará con Andrés Monteagudo, que cando era patrón maior puxo en marcha a Festa do Percebe. Para degustar o produto, o programa acudirá xunto a José Luís Fernández, propietario do restaurante Faro de Sálvora.