Susana Seivane colabora cos italianos Zampogneria

A gaiteira coñéceos dende hai anos e durante este verán falarán da posibilidade de realizar un disco conxunto

10.06.2017 | 19:56
Imaxe dun concerto dos Zampogneria.

Os encontros entre músicos propician posteriores colaboracións musicais que plasman o interese en realizar algo conxunto. Zampogneria é unha formación italiana que ten como eixe sonoro a gaita e o seu nome provén da zampogna trasalpina, que é a gaita do seu país. Marco Tomassi, Georgio Pinai e Marco Iamele botan mans de pezas antigas, algún tema tradicional do folk europeo e composicións propias para elaborar o repertorio incluído no álbum Fiumerapido. "A gaita resistiu a transformación do mundo pastoral italiano na que se difundiu e agora proponse como un instrumento axeitado para calquera tipo de música", salienta Tomassi.

Entre os colaboradores aparecen o francés Eric Montbel e David Sheperd, violinista da banda Blowzabella, pero o que nos interesa dende Galicia é saber como apareceu entre esa lista de convidados a gaiteira Susana Seivane. "Coñecémonos dende hai anos. O meu pai e o meu tío coincidiron con eles nun festival na Bretaña e a relación vén de aí. Seguen a miña traxectoria e gústalles a música tradicional galega e meu xeito de tocar a gaita, así que sempre pensamos nesa posibilidade de facer algo xuntos. Estarán pola nosa terra e imos falar da posibilidade de realizar un disco xuntos, composto por pezas tradicionais galegas e italianas", sinala Seivane. Para esta obra querían realizar unha unión da muiñeira coa tarantella e a segunda peza do álbum titúlase Muñeira de Chantada/Ballarella /Muñeira mariñeira. "A nosa muiñeira ten un ritmo semellante á súa tarantella e iso facilita a conxunción. Chegeui a actuar con eles nun festival en Italia e a verdade é que funcionou moi ben".
Para Seivane os compoñentes de Zampogneria "son uns grandes estudosos da música medieval e italiana e fan cousas moi interesantes coas gaitas que tocan, que soan de marabilla".

No que atinxe ao seu novo disco, a coruñesa comenta que sairá ao mercado a primeiros de setembro e chamarase Fa, iniciais dos nomes dos fillos. "Será un disco distinto aos anteriores. Soará moi moderno e todas as composicións son miñas ou de Iago Rodríguez, o meu baixista e produtor", di Seivane.

Compartir en Twitter
Compartir en Facebook

Lotería del Niño 2014

Comprobar Lotería del Niño

Toda la información de la Lotería del Niño. Comprueba los números premiados con nuestro widget de la Lotería del Niño.

 
Enlaces recomendados: Premios Cine