11 de mayo de 2018
11.05.2018

Carta aberta ao presidente da Xunta

O pasado 20 de abril recibín a confirmación oficial, de parte do presidente da Autoridade Portuaria, do que xa sabiamos

20.05.2018 | 17:44
Carta aberta ao presidente da Xunta

O pasado 20 de abril recibín a confirmación oficial, de parte do presidente da Autoridade Portuaria, do que xa sabiamos na Coruña grazas aos medios de comunicación e dende varios días antes. Refírome á sinatura dun acordo entre o Ministerio de Fomento, Puertos del Estado, a Xunta e o ente portuario da cidade para definir e desenvolver cuestións fundamentais que condicionan o futuro do borde litoral da Coruña. Acordo, por certo, no que as partes poñen negro sobre branco algo que non deixa de preocuparnos: a aposta pola continuidade da operación urbanística deseñada nos convenios de 2004 e mesmo pola aceleración dos prazos e os procedementos para a desafectación dos peiraos de Batería, Calvo Sotelo e San Diego.

Sen prexuízo de recoñecer que o acordo responde parcialmente a algunhas das demandas expresadas polas mobilizacións populares e por sucesivos pronunciamentos da maioría plenaria na nosa Corporación, cousa que celebro e que cómpre agradecerlle ao exercicio de rebeldía democrática da nosa veciñanza, o certo, presidente, é que me sinto na obriga de manifestarte, como máximo representante da cidadanía coruñesa, a miña profunda decepción, tanto co fondo como coa forma. Lembra que na praza de María Pita nunca recibimos unha resposta oficial á proposta que en outubro do ano pasado lle fixemos a todas as administracións, incluída a Xunta, para a constitución dun consorcio público que impulsase e xestionase a transformación da nosa beira atlántica.

Entenderás que non se pode considerar axeitado que dúas administracións e dous organismos delas dependentes adopten acordos de semellante importancia para a cidade ocultándolle en todo momento a negociación ao Concello da Coruña, e mesmo sen ter a delicadeza de informalo previamente das intencións, máxime cando despois se pretende que a administración municipal se sume ao acordo nas condicións previamente pactadas na súa ausencia. E non só porque vaia ser necesario antes ou despois o seu concurso, como titular da competencia en materia urbanística, senón sinxelamente porque non se poden tomar decisións de tanta importancia e tan desacertadas para o futuro da cidade sen contar cos seus máis directos representantes.

Este sentir, como sabes, é maioritario na Corporación da Coruña e foi respaldado tamén de xeito explícito no Pleno da Deputación provincial e polas alcaldías de Oleiros, Sada, Cambre, Culleredo, Bergondo e Betanzos, sensibles ao destino dun patrimonio común que vai ter un papel clave no futuro da área metropolitana. Non só porque supoña un xesto de deslealdade institucional, senón porque agrava o déficit de transparencia que este asunto arrastra dende hai case unha década e media. Non esquezamos, presidente, que a fórmula escollida para dar consistencia administrativa ao acordo careceu e vai carecer do imprescindible proceso de exposición e participación públicas.

Cando digo que foi un acordo desacertado é porque, máis alá da evidente ausencia de decoro institucional, o certo é que o protocolo asinado non se encamiña na dirección correcta, na que o futuro do bordo litoral da Coruña e dos seus terreos portuarios esixe. En primeiro lugar, porque pretende manter a vixencia dos convenios de 2004, mesmo ameazando con responsabilidades ao Concello da Coruña no caso de modificar o planeamento urbanístico, cando o sentido común da cidade xa dixo hai tempo que aqueles pactos e o modelo de cidade ao que respondían deben ser revisados. E deben revisarse porque nin son realistas nin resolven as necesidades de financiamento orixinadas pola construción do porto exterior, e ademais someten un enclave moi sensible da cidade a unha presión urbanística excesiva e inasumible dende un entendemento razoable da planificación urbana. En segundo lugar, porque seguen sen poñerse enriba da mesa as verdadeiras solucións para a viabilidade de punta Langosteira, unha infraestrutura básica para o desenvolvemento económico da Coruña e de Galicia, así como para a seguridade marítima e das nosas costas, na que o Goberno de España debe comprometerse.

Sempre hai oportunidade de reconducir as cousas se hai vontade de facelo. A miña, neste caso, é absolutamente sincera. Gustaríame que abrísemos as canles para tentar chegar a un acordo que concilie os diversos intereses das administracións que estamos dun xeito ou doutro vinculadas ao desenvolvemento dos terreos portuarios da Coruña, e, sobre todo, da veciñanza da nosa cidade e a súa área metropolitana. As bases para este acordo deben pasar por unha negociación que recoñeza o liderado da cidade da Coruña e das súas institucións, que implique unha renegociación e revisión dos convenios de 2004, garantías para a titularidade e a xestión públicas na transformación do litoral e un instrumento compartido, un consorcio público no que participen todas as administracións que crean en nós, para materializar os desexos desta cidade para o seu futuro.

Podes estar seguro de que, se existe unha colaboración leal e sincera, o Concello da Coruña vai estar á altura, para deseñar os espazos públicos de calidade e os equipamentos sociais e culturais que Batería e Calvo Sotelo poden ofrecer á cidade, e para axudar a financialos, se é preciso; para impulsar un distrito do mar en San Diego, que sume á actividade portuaria outras vinculadas á economía azul e á innovación, que sexa referente dun modelo económico sostible e marítimo para o noso país; para deseñar un bordo litoral baixo os principios da calidade urbana, o compromiso medioambiental, a mobilidade sostible e unha saudable, leal e produtiva relación e integración entre o porto e a cidade. Para falar de todo isto e, particularmente, para que podamos fixar conxuntamente unha convocatoria da comisión de seguimento dos convenios de 2004, quedo á túa disposición para vérmonos canto antes, preferiblemente antes de que remate este mes de maio.

Houbo unha época na que a Presidencia da Xunta entendía e respectaba o que significaba A Coruña e as súas institucións para Galicia. Tes a oportunidade de amosarlle á nosa veciñanza que a confianza nesta cidade non é, para a Xunta, cousa do pasado, senón do presente e, o que é máis importante, do futuro.

Compartir en Twitter
Compartir en Facebook

ESPECIAL

PREMIOS OPINIÓN MÚSICA RAÍZ

Premios Opinión da Música de Raíz

Consulta aquí a información dos premios de música do noso diario


GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es
Enlaces recomendados: Premios Cine