A Xunta do Goberno Local de mañá acordará a declaración de desistencia da empresa Construcciones Fontenla S.A. das licenzas para construír un edificio residencial e un garaxe-aparcadoiro no sector 7 do plan parcial Someso-Recinto Feiral. A sociedade solicitou estes permisos en 2006 e 2008 respectivamente e pagou unhas taxas de tramitación por valor de 4,62 millóns de euros e 17.400 euros, pero non chegou a empezar as obras. O Concello requeríulle en 2013 a emenda das deficiencias atopadas nos proxectos, que a empresa non acometeu.
O Concello abriu en febreiro pasado o procedemento para declarar a caducidade da licenza concedida en decembro de 2011 a Canovan Patrimonios, empresa vinculada ao presidente da patronal coruñesa, Antonio Fontenla, para a construción dun edificio de 17 alturas en Someso, tamén sen comezar. O empresario pretendía edificar un inmoble residencial de 17 plantas e 132 pisos fronte a Espacio Coruña.
