Fernando Vázquez suliña que “queda tempo, o resultado non é tan vital”
“Hai que facer máis puntos porque hai que chegar en ventaxa con respecto ao outro grupo ao que miramos de esguello”
Enredado na procura da fórmula que permita que o Deportivo xogue mellor cando ten o balón, Fernando Vázquez está máis centrado en “atopar fórmulas que leven o equipo a que estea seguro do que estamos a facer e que nos prepare para a segunda fase da competición”, explicou o adestrador branquiazul onte en rolda de prensa. “Que a forma de xogar nos diga por onde temos que ir e despois que o resultado nos diga si funcionada ou non. Imos expoñer e a ver que pasa co resultado, o resultado nestes momentos non é tan vital”, razoou o técnico de Castrofeito.
É sabedor de que o seu equipo está a acadar resultados positivos —tres vitorias e dous empates—, pero tamén o é de que as sensacións non son boas, por esa razón a súa teima con atopar o xeito de que o equipo teña “máis enerxía”. “O que me ocupa é que o equipo sexa máis fluído e con máis enerxía; non sei porque razón, quizais a pretemporada tan rara, nestes momentos de inicio de liga sinto que o equipo lle está costando rodar polo campo con máis fluidez. As causas son múltiples, evidentemente. Estamos nunha marcha moi monótona, é como se lle faltase un pouco de chispa”, explicou.
Aínda que sexa este asunto o que máis ocupe a Fernando Vázquez, e este suliñe que o resultado “non é tan vital nestes momentos”, o adestrador si sabe que o que importa é gañar, por iso mira de esguello ao grupo B, ademais de atender o que fai o seu equipo e os rivais directos. “Eu sempre digo que temos a posibilidade de sumar tres puntos, e hai que facer máis puntos porque hai que chegar en ventaxa con respecto ao outro grupo ao que miramos de reollo”, recoñeceu. A situación mudaría se os seareiros puidesen ir ao estadio de Riazor, pero non é o caso. “Seguro que estaríamos moito mellor”, asegurou o adestrador branquiazul. “O outro día —perante o Coruxo— sentíame empoderado pola presenza de mil seareiros; eu creo que o equipo gañou ese partido pola xente que había nas bancadas. E con Riazor cheo, sería espectacular”, recoñeceu un Vázquez quedo, aínda que sensible con certos comentarios que si afectan o rendemento dos futbolistas. “Eu non digo que non haxa crítica, pero os xogadores cando teñen confianza dan mellor rendemento. O ano pasado tiñamos un empuxe que este ano non notamos, pero creo que a maioría dos deportivistas están co equipo, están comigo e están co clube”, rematou.
Keko, difícil que xogue; Rolan, “máis cerca”
Do estado dos seus futbolistas, Fernando Vázquez recoñeceu que Keko Gontán afástase do partido de mañá perante o Racing de Ferrol. “É unha dúbida alta; tivo malas sensacións (no adestramento de onte) e si vemos que sigue así será descartado”, dixo o adestrador. Outro nome propio é o de Diego Rolan, de quen asegurou que “está máis cerca”, pero non en condicións de xogar 90 minutos. “Está para xogar, e podería ter minutos o domingo”, pero o que máis lle interesa do uruguaio é saber “cando sería máis ineteresante” darlle entrada. Os únicos futbolistas totalmente descartados para o partido de mañá son Derick e Miku, todos os demais, pendentes de Keko, poderán entrar na convocatoria que o adestrador deportivista dará hoxe para enfrotarse a un Racing que amosa “unha forma de xogar moi semellante na casa e fóra”, onde acadou a dúas únicas vitorias da temporada. “É un equipo forte”, suliñou Vázquez.