Luísa Villalta volve ás aulas de Sada cunha homenaxe dos escolares impulsada pola Real Academia Galega
“Somos moitos os que aprendemos con ela a amar a nosa lingua”, di o alcalde, que foi alumno da poeta
Redacción
A Real Academia Galega celebrou onte en Sada a Primavera das Letras, un acto en homenaxe á protagonista do Día das Letras Galegas, Luísa Villalta, que impartiu clases de Lingua e Literatura galegas no IES Isaac Díaz Pardo dende o ano 1991 ata o seu pasamento no 2004. No acto tamén participaron Susana Villalta, irmá da escritora, e o alcalde de Sada, Benito Portela, que foi alumno da homenaxeada.
“Somos moitos os que aprendemos con ela a amar a nosa lingua, a coñecer a nosa literatura. Luísa foi para moitos de nós mestra máis aló das súas ensinanzas”, expresou. “Ler a Luísa é a mellor maneira de recordala e homenaxeala. Dende o Concello de Sada animamos toda a nosa veciñanza a que se achege á súa obra”, invitou o rexedor.
O acto incluiu a presentación do conto biográfico Violino, Inglesa e o libro xigante. Pequena biografía de Luísa Villalta, de Xoán Babarro e Ana María Fernández, que pretende “achegar a autora á xente miúda de maneira atractiva”, sinalou Fina Casalderrey, académica responsable da páxina web primaveradasletras.gal, na que pode descargarse o relato e unha serie de actividades arredor do vital e literario da autora que irán medrando nas vindeiras semanas.
O presidente da RAG, Víctor F. Freixanes, e a académica coordinadora do proxecto, Fina Casalderrey, inauguraron un acto que tivo por protagonistas aos escolares. Alumnado do colexio Sada y sus Contornos levaron á escena unha adaptación teatral do conto biográfico de Luísa Villalta realizada pola mestra Tamara Rodríguez. A continuación, o alumno Roque Souto Parga e as alumnas Eva Mato Escurís e Candela Naya López, de primeiro de bacharelato do instituto Isaac Díaz Pardo, deron lectura a varios fragmentos de obras poéticas e ensaísticas de Luísa Villalta.
Susana Villalta púxolle o ramo ao acto. A irmá da autora agradeceu a homenaxe celebrada na vila onde foi docente. “Luísa entraba cada día no seu instituto de Sada coa ilusión primeira para encontrarse co seu alumnado, arestora representado por estes mozos e mozas que prepararon con ilusión este acto”, apuntou.
- Detenidas dos personas y desmantelado un punto de venta de droga en Vilarrodís
- Cambre declara la nulidad de dos contratos en precario tras el dictamen del Consultivo
- Inditex invertirá 15 millones en construir un comedor en su cuartel general en Sabón
- Abre al público el nuevo recinto verde de O Burgo
- Arteixo planea conectarse con A Coruña por medio de carriles bici que pasen por la costa
- Excarceladas dos jóvenes tras volcar su coche al salirse de la autopista AP-9 en O Burgo
- Inquietud en Veigue por el plan para crear un gran parque litoral y reubicar los ‘campings’
- Tanxugueiras, Mondra y la orquesta Los Satélites actúan gratis el 2 de mayo en Mera